Online Reporter
Zimpapers Sports Hub
UJOHN Nkonde obephethe ezemidlalo eHwange, esabelweni seMatabeleland North okweminyaka engedlula 48, kasekho.
Ubeleminyaka yokuzalwa engu-85.
Udlule emhlabeni ngoMvulo edolobheni leHwange ngemva kokugula isikhathi eside. UNkonde, owazalelwa eHwange, ukhulise inengi labadlali ebalolonga kumidlalo etshiyeneyo. Bakhona kubadlali laba asebezintshantshu.
Indodana kamuyi, uNelson uthe uNkonde udlule emhlabeni ngoMvulo kuliviki njalo amalungiselelo abengakabikhona ngoba ezinye izihlobo zakhe ziseZambia.
UNelson, ohlala eZambia bekukhangelelwe ukuthi angene kuleli ngoLwesithathu ukuzophathisana labafowabo ukuze umsebenzi wokungcwaba uyise wenziwe ngemfanelo.
“NgisaseLusaka ngilungiselela ukuthi sisuke kuleli sizobeka ubaba eZimbabwe. Usitshiye ngoMvulo ngemva kokugula,” kutsho uNelson, ekhuluma lentatheli kuliviki.
UNkonde wadlala ibhola lenyawo okwamajaha onke akhulela kundawo ezifana leHwange okulemigodi. Kwakungela okunye okwenziwayo ngaphandle kokuzilibazisa ngebhola langeminye imidlalo.
Yena ibhola walidlala waze wafika kuqembu lesibili elalimele umgodi weWankie Colliery ngeminyaka yabo-1960.
Wayephitshekile njalo ngokugijima lapho okufana lasebholeni wafika kubanga lokudlalela iqembu lesibili leWankie FC elalidlala kuligi yemigodi (Chamber of Mines).
UTwyman Ncube owakhula ekhangele oNkonde njengabafowabo abadala edlala laboMwape Sakala umnewabo, uthe umuyi wayelesiphiwo kwezemidlalo.
“Wayezinikele njalo elothando lwalokhu akwenzayo. Wadlala ibhola wafika kubanga labasekeli beqembu elikhulu leHwange. Kodwa wenza okukhulu esengumqeqetshi njalo engumsekeli ka-Sports Officer,” kutsho uTwyman.
UDebra Rendo owadlalela iqembu leHwange kubhola lokuqaga uthe uNkonde waba lesandla ukuthi abe ngumdlali olodumo.
URendo wadlala ibhola lokuqaga waze wasuswa eHwange ekhangwa liqembu likaLoliwe elanqoba izicoco zelizwe ezedlula inhlanu.
“Wangithatha ngimncane wangifundisa ukudlala lumdlalo. Wayesazi akwenzayo njalo wayethi kungaba ngcono athathe abambalwa abangazi umdlalo kulokuthi abuthe abaziyo bodwa. Uphakamise ezemidlalo eHwange leZimbabwe yonke.”
UNkonde waduma njalo kumdlalo wokudonsana ngentambo iTug-of-War. Iqembu lakhe leHwange labusa okweminyaka engedlula amatshumi amathathu kuChamber of Mines, Zimbabwe International Trade Fair leHarare Agricultural Show.
