Online Reporter
Nkosilathi Sibanda
UMQONDISI omkhulu wogatsha lwe-Agricultural and Rural Development Services (Ardas) uNkosikazi Medlinah Magwenzi usekhuthaze ukuthi kwandiswe izikolo zabalimi ezibizwa ngokuthi ngama-Farmer Field Schools, ebika ukuba kumele zibekhona kuwo wonke ama-ward ukuze kuqiniswe ulwazi lwezokulima.
UNkosikazi Magwenzi, kumbiko owethulwe emakhasini e-Ardas ebulenjini, uthe izikolo lezi sezibonakalise ukuthi ziyancedisa kakhulu ekufundiseni abalimi ngendlela ezisebenzayo kwezokulima ngoba bafundiswa ngokwenza umsebenzi wabo emasimini kusukela ekulungiseni umhlabathi kuze kufike isikhathi sokuvuna lokuthengisa izilimo.
“Ama-Farmer Field Schools enza ukuthi abalimi bafunde ngokwenza umsebenzi emasimini abo. Lokhu kubanceda ukuthi babone indlela efaneleyo yokulima kusukela ekulungiseni umhlabathi kuze kufike ekuthengiseni izilimo zabo,” kutsho uNkosikazi Magwenzi.
Uthe izikolo lezi zivame ukukhokhelwa ngabakhokheli bezigaba ezifana lezinduna labalimi abalolwazi, okwenza kube lula ukuthi abantu emphakathini bafunde ndawonye, babelane ulwazi njalo bafunde indlela ezintsha zokulima ezithuthukisa isivuno.
UNkosikazi Magwenzi uthe ukwandisa izikolo lezi kuzo zonke izigaba kuzakwenza abalimi abanengi bathole ithuba lokufunda beseduze lalapho abahlala khona.
Uthe kuzancediswa njalo abalimi abancane ukuthi bathole ulwazi abangasoze baluthole kwezinye indawo zokufundela ezisemthethweni.
Ukhuthaze umphakathi labakhokheli bezindawo ukuthi basebenzelane labalimisi ukuze kusungulwe ezinye izikolo zabalimi.
