Online Reporter
Nkosilathi Sibanda
UKUVALWA okwesikhatshana komgwaqo ka-6th Avenue phakathi kukaHerbert Chitepo Street loBasch Street koBulawayo, sekudale ukuminyana okukhulu kwezimota lokuphazamiseka kwabagada imitshova.
Isiqephu salumgwaqo sivalwe ngoLwesibili kuviki ephelileyo njengoba ikhansili iqale umsebenzi wokulungisa umgwaqo lokunye.
Ngokunjalo ikhansili yethule isimemezelo sokuqondisa abatshayeli kodwa sekuvela ukuthi bakhona abatshayeli, ikakhulu abemitshova, abadelela umbiko wekhansili.
Ukuvalwa kwalumgwaqo kulindeleke ukuthi kuhlale inyanga ezintathu kulungiswa loLobengula Street lemigelo yamanzi.
Ngaphansi kohlelo olutsha lwezokusebenzisa imigwaqo, imitshova ekade ithwalela ku-6th Avenue isikhangelelwe ukuthi iyethwalela eGodini Terminus. Kodwa, abagada umtshova bathe ezinye izimota azilaleli iziqondiso, nanko ziqhubeka zithwala abantu ngokungekho emthethweni kuBasch Street laphakathi kwedolobho, ezinye njalo sezithwalela erobhothini likaLuveve Road duzane lesikolo seRobert Tredgold.
Lokhu sekudale ukuminyana kwezimota lokuthwala nzima kulabo abagada imitshova esebenzisa uLuveve Road.
“Ngichithe phose ihola ngizama ukuthola umtshova oyiwo. Lapho engihlala khona, imitshova eminengi kayithwaleli eGodini. “Eminye ithwalela abantu endaweni ezingavunyelwayo, kuthi eminengi yakhona kayifuni kuyathwalela eGodini,” kutsho uNkosikazi Thandeka Moyo, ohlala eNtumbane.
Omunye, uMnumzana Sipho Ncube ogada imitshova eqonda kuLuveve Road uthe lesi isimo sesisenza kube nzima kuzisebenzi labafundi.
“Sekulokuminyana okukhulu ekuseni lantambana. Imitshova ima lapho ethanda khona kuBasch Street, lokhu kudala ukuminyana okungadingekiyo. Ikhansili lamapholisa kumele babeke umthetho ukuze isimo singabi sibi kakhulu,” kutsho yena.
Omunye umtshayeli owale ukuqanjwa uthe kabafuni ukuya eGodini ngoba kuthatha isikhathi ukuthi bathwale abantu ngenxa yokwanda kwemitshova.
“Abantu bafuna ukuhamba masinya, ngakho abanye bakhetha ukusebenzela edolobheni bengayi eGodini. Kodwa siyazi ukuba sekudala isiphithiphithi ngoba wonke umuntu uselayitsha lapho athanda khona,” kutsho lumtshayeli.
Kusenjalo, ikhansili iphinde yakhupha indlela ezingasetshenziswa ngabatshayeli.
Izimota eziya enyakatho zizadlula ku-Third Avenue, eziseningizimu lezinye ezisentshonalanga zizadlula ku-9th lo-11th Avenue.
Ikhansili icele abatshayeli labantu ukuthi baqaphele njalo balandele imithetho yokulawulwa kwezimota.
