Online Reporter
Yintatheli kaMthunywa
KUDABA oluhlasimulisa umzimba kulendoda yeNtalale etshaye umkayo ngesigodo yambulala qede yalalisa umntwana oleminyaka emine yokuzalwa lesidumbu sikanina yabaleka.
Isiga lesi senzakale mhlaka 16 kuyonale inyanga lapho uJames Mkhwananzi atshaye umkakhe uBongani Nyathi wambulala watshiya umntanabo lesidumbu wadliwa ngumswenya.
Ngokutsho kwezakhamizi umuyi uBongani wayeke walwa loyisekazi ezitolo kubangwa ukuba uyisekazi uthandana lomkakhe. Kubikwa ntambama sebesendlini uBongani waqala ukubuza indoda ukuthi kungani ithandana lobabakazi wakhe kwahle kwaqala umsindo. UMkhwananzi waphuma phandle wathatha izigodo eziqatha zephane ezimbili wafika watshaya unkosikazi wakhe ekhanda waze wafa uthe eqeda lapho wathatha umntanakhe wamlalisa endlini lapho okwakufele unina khona.
UJames yena wahle wabaleka ebusuku wahamba umntwana walala kwaze kwasa lesidumbu. Ekuseni umntwana wavuka elele eceleni kukanina ecabanga ukuthi uyaphila.
Omunye olilunga lemuli ongathandanga ukuqanjwa ngebizo ubike ukuba isidumbu sikamuyi lomntwana kwatholakala ngomunye oyisisebenzi esitolo sikamsolwa lalo osengumuyi.
“Umuntu othengisa esitolo sabo wafika emzini wabo ekuseni wafika waqoqoda wamemeza wezwa zwi wacina evula endlini wathola umntwana ulele eceleni kukanina unina evele esethule kudala.
“Uyise womntwana akwaziwa ukuthi waqonda ngaphi kodwa ngemva kwensuku ezimbalwa wazihambisa yedwa emapholiseni eGuyu, sikhuluma nje uvalelwe. “UBongani sesimbekile, simbeke khonale emzini wakhe ngempelaviki. Silethemba ukuba umthetho uzadlala indima yawo,” kulandisa owemuli.
Iphephandaba likazulu lixhumane lobambele isikhulumi samapholisa eMatabeleland South uAssistant Inspector Stanford Mguni obike ukuba indaba enjalo balayo.
“Udaba lukametheswacala uJames Mkhwananzi osolwa ekubulaweni umkakhe uBongani Nyathi ngemva kokungazwanani thize silalo. Uphenyo lusaqhubekela phambili, uMkhwananzi uzilethile emapholiseni.
Sithanda ukukhuthaza uzulu ukuba nxa kungaba lengxabano adinge omunye owesithathu ongacendisa ukuxazulula ingxabano le kungelabudlwangudlwangu. “Abantu kabafunde ukuhlonipha impilo, kungabalohlupho bayedinga inkokheli zesigaba, abenkonzo, kumbe esinye isihlobo esingabancedisa ukulungisa udaba olubahluphayo kulokudala amacala anje acina ngokuchitheka kwempilo,” kuphetha uAsst Inspector Mguni.
