Online Reporter
Ethel Ncube
KUSEHLAKALO esethusa ababalisi kunye labafundi besikolo seBattlefield Primary eMbembesi kubikwa kulabantu abalunguza abafundi ngophahla bephakathi kwezifundo okwenza bacine besehluleka ukukhuluma.
Kubikwa imbedumehlwana le yenzakale ngoLwesithathu ngeviki ephelileyo njalo abafundi ababili bacine bengasakhulumi.
Umhlola lo kubikwa ubuye wabangela ukuthi inani labafundi ababuye esikolo kule iviki lehle.
Lokhu okwenzakalayo kunakanelwa ukuthi kungabe kubangelwa yimimoya esesikolo osekusenza abazali badinge abakhulekayo ukuthi bazolungisa isikolo nanko ekukhangeleni kwabo phezulu kophahla kabazange babone lutho.
Kubikwa abazali bangavele bafulathele isikolo abafundi bayaqala futhi ukubona abantu phezulu kophahla belunguza.
Ekhuluma lentatheli omunye umzali ubike ukuba abantwana bethukile ngesehlakalo lesi.
“Abafundi sebesesaba ukuya esikolo ngemva kokuba kwenzakale isiga lesi. Bathi befunda ekilasini babona abantu belunguze phezulu ephahleni bethwele amarekeni.
“Umfundi oyedwa wamemeza umbalisi ethi kulabantu ephahleni ababalunguzileyo wathi eqeda wathula.
Umntwana lo bathi sebezama ukumbuza wayengasakhulumi sevaleke ukukhuluma ilanga lonke watshona engakhulumi.
“Ababalisi babiza usobhuku lezakhamizi ukuba bakhangele ukuba kulani phezulu kodwa kabazange babone lutho. Bathe sebehambile futhi babonakala abantu laba. Isimanga yikuba babonwa ngabantwana kuphela.
“Kwabizwa futhi abadala badinga baswela abatholanga lutho yikho ukuqala ukunanzelela ukuba vele abantu ababonwa ngabantwana bodwa akusibo bantu. Kungakho njengabazali sesihlale phansi sathi kungcono isikolo sizame ukulungiswa ngoba kwelinye ilanga sizalahlekelwa ngabantwana,” kubika umzali.
Ekhuluma lephephandaba likazulu usobhuku wakule indawo uMnumzana Benjamin Swene ubike ukuba udaba olunjalo lukhona.
“Abantwana balohlupho bathi bayabe belunguzwa ngabantu ababili phezu kophahla, sesizamile ukuthi lathi sifike sikhangele ukuthi kungabe kulabantu abacatsha phezulu kodwa kasitholi lutho.
“Umntwana oyedwa lo nguye owabalo hlupho engasenelisi ukukhuluma kodwa okwakhathesi sesibangcono. Sike senza umhlangano ngodaba lolu sizama ukuba kulungiswe izincwadi zakhona kubuye umuntu akhangele ukuthi kanti kuyini okulunguza abafundi,” kuphetha uSobhuku uSwene.
