admin
KUSOBALA ukuthi abantu bakoBulawayo bayawuthakazelela umculo wezokholo njalo baqhubekela phambili bethuthukisa ukuhlabelela kwabo. Kuliviki uMthunywa uliphathele umculi wengoma zokholo uSikhohliso Alex Ndlovu. Zizweleni okunengi phakathi kwengxoxo ebekhona phakathi kukaSikhohliso Ndlovu (SK) loEthel Ncube (EN).
EN: Uzulu uthanda ukwazi ngembali yakho akusithi fahla kancane?
SK: Ngizelwe mhla zilitshumi lanhlanu kuMpalakazi ngo1981 khonapha koBulawayo. Ngikhulele khonapha koNtuthu. Imfundo yami yaphansi ngayenzela eNzwananzi Primary School kuthi imfundo yaphezulu ngayenzela eSt Bernards High School. Ngaqeda imfundo yami yaphezulu ngo1998. Ngasuka lapho ngaya fundela ubufundisi eMazowe ngo1999 kwaze kwafika u2000. Kwathi ke ngo2000 ngayafunda eSt Augustine koBulawayo ngenza iDiploma lePhilosophy ngaliqeda ngo2004. Kusuka lapho ngaya eChishawasha ngayafundela iTheological Studies kwaze kwafika u2008 lapho engaqeda khona izifundo zami zobufundisi. Ngayasebenza ngingumfundisi eMpandeni Mission, ePlumtree okweminyaka emibili, ngemva kwalokho ngaya koNtuthu ngayasebenza ngingumfundisi njalo eHoly Trinity okweminyaka emine, okwakhathesi ngingumfundisi eSt Patricks koBulawayo.
EN: Waqala nini ukuhlabela?
SK: Ngaqala ukuhlabela ngikugwalo lwesibili kumfundo yaphansi eNzwananzi. Ngikhulele kuqembu elalihlabela enkozweni yeRoma eSt Adolph. Ngaqhubeka ngihlabela ngaze ngafika kumfundo yami yaphezulu eSt Bernards High School lapho engancediswa ngumbalisi wami ukuhlabela i-choral music. Ngemva kwalokhu ngangilokhu ngilolonga isiphiwo sami sokuhlabela ngaze ngafunda ukuzibumbela, ukubhala lokuhlabela ingoma. Ngiyenelisa ukuhlabela ngisebenzisa amakatari, keyboard lokunye okokuhlabelisa. Okwakhathesi ngiyahlabela njalo ngincedise abanye. Ngilezingoma ezingu-60 engazibumbela zona ngaphinda ngazihlabelela ngiphinde ngibe leDVD eyodwa.
EN: Ngaphandle kokuba ngumhlabeleli kuyini okunye okwenzayo?
SK:Ngingumfundisi ebandleni leRoma njalo ngingumbalisi wokuhlabela eMatshemhlophe. Ngifundisa abasaqalayo ukufundela ubufundisi ukuhlabela.
EN: Wenelisa njani ukuthi uthenge izikhali zokufaka estudiyo sakho?
SK: Okunengi ngakuphiwa ngabantu engikusebenzisa ekuhlabeleni kuthi okunye ngangincedwa yikuncedisa abanye abahlabeleli ukuthi bacindezele izingoma zabo ngithole imali ngithenge izikhali ezifunekayo zokuhlabela.
EN: Uzibona ungaphi ngokuhlabela kwakho lokhu?
SK: Ngizibona ngiphumelela ngisiba ebangeni eliphezulu kakhulu. Ngifisa ukuvula isikolo sokuhlabela njalo ngifundise abasakhulayo ukuhlabela besebenzisa izikhali ezifana lamakatari lama-piano.
EN: Ukhangelele ukwenzani kuwonalo umnyaka?
SK: Ngikhangelele ukucindezela iDVD yami ethi Hlala lami Jesu.
EN: Njengoba ungumfundisi ukwenelisa njani ukuthi ngapha kumele ube semsebenzini wenkozweni ngapha kumele uhlabele?
SK: Ngiyakwenelisa ngoba isikhathi sami esinengi nxa ngikhululekile kangiyindawo ngichitha isikhathi esinengi sami ngisestudiyo sami ngihlabela.
EN: Mazwi bani enkuthazo ongawatshiyela abahlabeleli abasacathulayo?
SK: Ngikhuthaza abahlabeleli ukuthi bathathe isikhathi sabo ekuhlabeleleni balungisise lapho abalamaphutha khona. Okunye yikuthi imfundo iqakathekile kakhulu njalo nxa ufundile kulula ukwenza izinto. Ukuhlabelela kungabayisiphiwo kodwa imfundo iyadingeka ukuthi ikuncedise ekuthuthukiseni ukuhlabelela kwakho. Ukuhlabela ikakhulu ingoma zesonto kuyaphendula abantu njalo kuyabasilisa abadinga uNkulunkulu ngakho kuqakathekile ukuthi umuntu engakahlabeli aqale ahlolisise njalo abone ukuthi sephekeke wavuthwa emsebenzini wokuhlabela andubana aqale ukuhlabela.
Online Reporter