admin
Msilisi Dube
UMFOWABO kaSandra Ndebele ongumhlabeleli osacathulayo uFundani Ndebele usepheke idlalade lakhe lesibili elithiwa Backward never.
Umhlabeleli lo uthi ucindezele idlalade leli ngemva kokunanzelela ukuba abantu abanengi bakholelwa ebantwini kulokuthi bakholwe kuJesu.
Umhlabeleli lo uhlabela ingoma zokholo njalo uveze ukuthi ukhethe ukuba acindezele idlalade lakhe leli eGoli ngoba amastudiyo akhona ephucukile nxa ewaqathanisa lawalapha ekhaya.
“Amastudiyo eGoli aphucuke kakhulu. Kulemitshina eyenza ilizwi liphume linjengoba linjalo. Ilizwi lomhlabeleli liyabe lingahayizi. Inengi lemitshina esetshenziswa eZimbabwe midala njalo kayikhupi ilizwe kuhle.
“Nxa ilizwi lingaphumanga kuhle kubangela ukuba ingoma zakhona zingakhwabitheki kuhle kubalaleli. I-album yami ilengoma ezingu-7 zonke zibabaza amandla omthandazo lokwethemba kuJesu.
“Esikhathini esinengi nxa abantu bephakathi kohlupho kubanzima ukuba bekhuleke ngakho engomeni lezi ngibakhuthaza ukuba lanxa impilo isinzima kangakanani kabathembe uJesu umdali wabo,” kulandisa uFundani.
UFundani ubuye waveza ukuba kungoma zakhe lezi usebenze labanye abahlabeleli beGoli abadumileyo ukuze akhiphe ingoma ezilohlonzi.
“Kulabanye abahlabaleli abadumileyo abeGoli abangincedisileyo abafana loPamela Makhatshu kunye loBuhle Nhlangulela. Kuqakathekile ukuba njengaba-hlabeleli sincedisane ukuze sikhiphe ingoma ezilomsoco,” kuphetha uFundani.
Online Reporter