Online Reporter
Brandon Moyo
BASELE bezibuza ukuthi kumdlalo we-rugby kungabe kuqakathekiswa abesilisa ukwedlula abesifazane?
Umbuzo lo uvele ngemva kokuba unompembe eqede umdlalo wabesifazane obuphakathi kweWestern Panthers leHighlanders kusadlalwe imizuzu elitshumi kuphela ngempelaviki, kuligi yeBulawayo Metropolitan Rugby Football Board (BMRFB) Archer Clothing Rugby.
Isimanga yikuthi imidlalo yabesilisa idlalwe yonke yaphela, kodwa lo owabesifazane umiswe kungakafiki ngitsho lengxenye, isizatho kuyikuthi kumele kungene abafana enkundleni. Isizatho lesi kasizange siphathe kuhle amalunga leWestern Panthers laweHighlanders, akubone kulihlazo.
Ngesikhathi unompembe etshaya impembe yakhe, abadlali bamaqembu la bebecabanga ukuthi sekumele baye kukhefu, ikanti umdlalo ubusuphelile.
Umthetho weWorld Rugby kumidlalo yeRugby Tens (10s) uveza ukuthi ingxenye yomdlalo kumele ibeyimizuzu elitshumi njalo umdlalo wonke uba yimizuzu elitshumi lambili.
Kulandela isenzo lesi, inkundla zokuxhumana kuSocial Media zigcwale ngokukhonona okukhulu kubalandeli bomdlalo, abaqeqetshi labadlali.
“I-Panthers Ladies Rugby iqalise isizini yalo kakuhle, ikhokhela nge 12-0 phezulu kweHighlanders Ladies, kodwa abaqoqi bomncintiswano benze iphutha elicaphulayo ngokuvumela ukuphela komdlalo isikhathi singakapheli. Siyazibuza ukuthi kambe kungabe kuyikudelelwa komdlalo wabesifazane, kuqakathekiswa abesilisa? Amazing,” kutsho umbiko ovele kuPanthers, ikhonona ngomdlalo kubaqoqi bomncintiswano.
Iqembu liqhubeke lathi: “Umdlalo lo ubumnandi ukwedlula eminengi eyamadoda esijwayele ukuyibukela. Kuzwisa ubuhlungu ngoba besibukele ithalenta lobuciko be-rugby yabesifazane.
“Ngokomthetho, izinqumo zeWorld Rugby, kumidlalo yeRugby Tens, imidlalo kumele ibe lamahlandla amabili, ayimizuzu elitshumi linye ngalinye. Kumdlalo wethu kutsho ukuba sidlale isigaba esisodwa kuphela. Lapha abaqoqi bomncintiswano bephule umthetho wesihlanu weWorld Rugby Laws olawula isikhathi sokudlala. Abakwenzileyo yikululaza umdlalo lokunyathelela phansi amalungelo abadlali,” kutsho iPanthers.
Iqembu liqhubeke lathi: “Okudanisayo futhi yikuthi isizatho sokumiswa komdlalo wethu kwakuyikuvulelwa ithuba umdlalo wabafana besikolo, owadlalwa waze waphela. Siphoxekile ngoba amaqembu womabili ayelungiselele aphelela iviki yonke. Kwaphuma imali yokulolonga lokuhambisa abadlali enkundleni.
Intatheli yeZimpapers Sports Hub izame ukudingisisa ngodaba kuziphathamandla ze-rugby koBulawayo kodwa akuphumanga lutho, inengi lisesaba ukukhuluma.
Umgcinisihlalo weBulawayo Women’s Rugby uMusawenkosi Mpofu ucele intatheli ukuthi ixhumane lonobhala weBMRFB uGeorge Hlatshwayo kwehlula ukuthi abambe ucingo ngoLwesithathu.
