Online Reporter
Siphathokuhle Ngulube
Salibonani bafundi. Ngithemba liqhuba kuhle ezifundweni zenu. Emavikini adluleyo sigxile kakhulu ezintweni ezingadala izimpi ekuhlalisaneni kwabantu emaphandleni lemadolobheni.
Okumele sikunanzelele yikuthi ezinye zezinto ezidala ingxabano yizinto nje ezincane kodwa zisuka zidale umkhandlo phakathi kwabantu besezimemetheka-ke izimpi abanye bacine bengasakwazi lokuphanana umlomo.
Lanxa kunjalo lezi izimpi kufanele zixazululwe abantu bahlalisane ngokuthula. Phela esintwini kuyinto embi kakhulu ukuthi abantu bahlale ndawonye bangaphanani umlomo kumbe njalo bahlale befihlelane induku emqubeni.
Bayakholelwa abantu ekuthini izimpi lezi zidala kumbe njalo ziletha imikhokha ethile emulini.
Ngalokho-ke nxa sekuthe kwavela impi emaphandleni kumbe emadolobheni kuyadingwa izindlela zokuxazulula lezo zimpi ukuze impilo iqhubekele phambili ihamba. Akesikhangele emaphandleni ukuthi baziphatha njani izimpi.
Emaphandleni bakhona abakhokheli bezigaba. Laba yibo ababona ukuthi abantu bahlalisane kuhle yini. Ezindaweni lapho abantu abahlala khona kulaboSobhuku. USobhuku nguye umuntu wokuqala ukwaziswa nxa sekuthe kwaba lohlupho phakathi kwabantu. Labo abaxabanayo bayahambisa indaba yabo kuSobhuku ukuze ikhangelwe.
USobhuku uyabiza amadoda esigaba ixoxwe idingidwe indaba. Kwesinye isikhathi isisombuluko siyaphuma kanti kwesinye isikhathi kwehlule. Nxa sekwehlule indaba iyadluliselwa komlisa. Umlisa ubiza amadoda aseduze kwakhe ixoxwe njalo indaba. Ingehlula lapha koMlisa hatshi kutsho iyabe iyindaba enkulu kakhulu. Isizadluliselwa-ke enduneni. Ungayibona isisiya enduneni kutsho amadoda ehlulekile ukuncedisa la amadoda ukuba akhumisane umlotha.
Induna isikhathi esinengi ayehlulwa lutho njalo iyamane iqume nje lolodaba ngendlela ebona ngayo kanti futhi okumele sikulimuke yikuthi induna yiyo elelizwi lokucina, ayiphikiswa imane yenze nje ngendlela ecabanga ngayo.
Lanxa kunjalo ayiphonguquma nje udaba kodwa luqala ludingidwe ngamadoda kuze kuvele obala olohlupho.
Yayithi ingaquma induna lo oficakale elephutha uyagwetshwa ahlawuliswe okuthile. Isikhathi esinengi induna ihlawulisa olecala izifuyo ezithile. Ezinye zezifuyo ziba ngezayo induna kanti kwesinye isikhathi lo ophanjanisiweyo laye sengaphiwa ezinye zalezi izifuyo. Ezinye njalo izifuyo siyabulawa enduneni zidliwe ngamadoda abencedisa induna ukudingida udaba lolu. Le inyama ayilamkhuba iyadliwa nje ngamadoda kube kuhle kube njeya.
Konke lokhu kwenzelwa ukuba kugcinakale ukuthula ezigabeni kungabi lokudlephana okungenza abantu bacine sebekhangelelana emanzini. Ezinye izindaba emakhaya ziyahanjiswa emapholiseni. Amapholisa-ke lawo alendlela asebenza ngayo. Sizaxoxa ngayo kabanzi ngeviki ezayo. Kuhle-ke sihlalisane kuhle ezigabeni ukuze sibe lokuphila okuhle. Asihlanganeni ngeviki ezayo.
