Online Reporter
Imikhuba eyelama ukwenda
Minengi imicimbicimbi eyelama ukwenda, eyenza kuhlale kulokubusa emzini weNdebele. Umphekiso: Umalukazana kavunyelwa ukupheka engakaphekiswa. Uninazala umcuphela amabele amuphe, kuthiwe apheke utshwala.
Buphekwa nguye umalukazana, esebenzisa ibonda asala elitheza umthimba wakhe usuhambile. Utshwala lobo bubizwa buthiwe ngumphekiso ngobokumupha ilungelo lokupheka. Abulamcingelo, buyathwa nguhlabezulu.
Ukuphinda imikhondo: Mhla wamanqidi otshwala bomphekiso, umalukazana ubuyela kwabo esiyaphinda imikhondo. Kuyikubuyela okokuqala elokhu endayo. Nxa esesiyaphinda imikhondo uhamba lentombazana yakwabozala encinyane.
Lowo mntwanyana uyathula nxa ebingelelwa kuze kuthi nxa esekhungiwe ngemali kube yikhona evumayo. Ngokufananayo, kungaphekwa uyala ukudla baze bakhuphe imali abe sesidla. Ngemva kwalokho kuyabe sekuphelile okwalowo mntwanyana.
Kusisa umlobokazi uvukela ukugelwa inwele. Kusamele kuqanjwe ukuthi kakukho emthethweni ukuthi inwele zakhe zakuqala endile zigelwe ekwendeni kwakhe. Zigelwa kwabo mhla ezophinda imikhondo. Akukhathalekile ukuthi ugelwa ngubani, inqobo engumuntu owazi ukugela. Ugelwa kutshiywe isicholo emasekweni ekhanda. Isicholo leso siyisibonakaliso sokuba wendile. Isicholo lesi sibizwa kuthiwe licholo. Mhlalokho batshona bephumula, kusisa bavuke sebebuyela emuva.
Ukukhutshwa emasekweni: Lesi yisenzo sokukhulula umalukazana ukuze aziphekele yedwa nxa efuna. Phela abanye omalukazana babekhweleze ngokudla abakuselelwa ngomkabo. Ukukhutshwa emasekweni kwenziwa umalukazana eselomnyaka owodwa, emibili kumbe emithathu endile.
Kwakuthi mhla umalukazana evukele kude, uninazala asale ebasa umlilo phambi komnyango wendlu kamalukazana. Angabasa ubeka amatshe amathathu kube liseko, abesefaka imbizo yenkobe eziko. Ekuphendukeni kwakhe umalukazana uthola sekuthunqa intuthu phambi kwendlu yakhe; lembiza isithe qokolo eziko.
Kazazihlupha ngakho ngoba ekwazi ukuthi kutshoni. Uninazala uqhubeka ngokupheka inkobe zakhe engatsho lutho ngazo. Zingavuthwa uthuma umalukazana ukuba alethe imiganu yabantu bonke ekhaya. Angayiletha, uninazala uyaphakulula abesemtshengisa umganu ngamunye ngamunye ukuba ngokabani.
Uphetha ngokumtshela umalukuzana ukuba sebemkhuphile emasekweni, ngakho usengapheka yedwa. Lanxa uninazala engamchasiseli isizatho sesenzo sokuphakululela emganwini yonke, sitsho ukuthi nxa esephekile yedwa abophakululela umdeni wonke.
Nxa umalukazana engumntwana odalekileyo uyalela emasekweni kaninazala, ngaphandle kwanxa kusobala ukuthi uninazala kamfuni emasekweni akhe. Obukhali uyathokoza angezwa elokupheka yedwa angaphakululeli abanye. Yilo lolu uhlobo esizwa kuthiwa lwaluthonise ukukhutshwa emasekweni aboninazala.
Lungabona sebeluphuzele luthuma umuntu ayelucelela ebadaleni.
