admin
Salibonani bafundi! Kuhle ukuhlangana lani siqhubeka sixoxisana ngokusetshenziswa kolimi ezindaweni ezitshiyeneyo njalo ngezindlela eziqondileyo. Sizaqhubeka sikhumbuzana ukuthi umuntu olobuntu kamane akhulume nje kodwa ukhangela umumo aphakathi kwawo abesebumba inkulumo ehambelana lalowo mumo.
Kuvelile sobala phambilini ukuthi sithi le, “yinkulumo ngomumo. Lamhla ake sikhangele ukusetshenziswa kwezinkulumo ezimbili ezilandelayo ezithi, “Wenzile” , “Ungadinwa lakusasa”.
Izinkulumo lezi zande ukuhamba ndawonye. Umbuzo uthi, “zisebenza nxa kutheni lezi izinkulumo?” “Ziqakatheke ngani esintwini? Impendulo ithi, “ziqakathekile ngoba ziyindlela yokukhuthaza lokubonga owenze kuhle. Ziyasakha isizwe ngendlela ezehlukeneyo.
Izinkulumo lezi zande ukusetshenziswa nxa kunconywa kumbe kutshayelwa ihlombe lowo othe wenza kahle esintwini. Umuntu owenze kuhle kufanele ananzelelwe njalo anconywe ngendlela eqondileyo. Akulunganga ukuthi umuntu owenze kuhle umane umqhuzulele amehlo angathi yimbuzi ephekwe lempondo. Kwenza lowo owenze kuhle aphelelwe luthando acine engafisi ukuqhubeka ngokwenza okuhle, kuyanyampisa inhliziyo. Ukungancomi owenze kuhle kungenza njalo lowomuntu aguquke isimilo ngoba enanzelela ukuthi angaze enzeni akananzelelwa, ikakhulu kuntanga encane. Ukuncoma owenze kuhle kuyamkhuthaza ukuba aqhubeke njalo azizwe elomfutho wokwenza okuhle izikhathi zonke. Okungokhekhe ukubona ngokuveza izikhewu, kuhlekelela ukuthi kuyakuthakazelela ukunconywa.
Ake sikhangeleni ingxoxo kaSipho logogo uMaDube engaphansi.
USipho uvela esikolo, uhlangana logogo uMaDube ethwele kabuhlungu ekhanda kanye lezandleni, kwazise uvela thenga izibiliboco lezifela emlonyeni esitolo esikhulu sakoBulawayo. OkuSipho kugijima ngesiqubu somvundla kulandela uMaDube, kufike kuthi:
Sipho: Sabona gogo MaDube! Ngicela ukukusiza ngikuthwalele izimpahla zakho!
Gogo: Maye Ncube! Maye Zikhali wami!. Wangihlomulela mzukulu wami, intamo ivele ayisavumi!
Kuzithi hlasi okuSipho izimpahla zikagogo uMaDube sekuqunjwaqunjwa langamazwi kagogo uMaDube emtemeleza. Kutshitshe phambili sekutshaya umlozwi inhliziyo idlala lephaphu, amabatha akho asekhanya ngamandla. Ekufikeni kwabo ngekhaya ugogo uMaDube uthi,
“Wenzile mzukulu wami, ungadinwa lakusasa”. Uzakhula ube yindoda emadodeni!
Maye! kujabule kufe okuSipho. Kuveze izikhewu zakho kube obala ukuthi amazwi kagogo uMaDube akuhlabe kwamancane. Ngaphakathi kuziqhenye kakhulu ngomsebenzi okuwenzileyo, kuzibone kungumuntu ebantwini, kufunge kugomele enhlizweni ukuthi kuzahlala kusenza kuhle ebantwini abadala.
Sizaqhubeka sisuka lapha kuviki ezayo
Online Reporter