admin
YiNtatheli kaMthunywa
UMDLALI odlala ibhola likanobhutshuzwayo okungathandabuzwayo uKudakwashe Mahachi usebike ukuba ezakhe izandla zizayibamba i$4 miliyoni, okungumvuzo womqhudelwano wenkezo yamazwe iAfcon ozaqhutshwa kuZibandlela ngomnyaka ozayo.
UMahachi, osetshibilikela iGolden Arrows, utsho kanje kulandela ukubika kwenhlanganiso yeCaf ukuthi isikhweze isisekelo sayo somvuzo kulinkezo. Intshantshu yomncintiswano lo inikezwa i$4 miliyoni. Ngeminyaka edluleyo iCaf ibikhipha i$1,5 miliyoni. NgoLwesibili ebusuku, iCaf yazise inhlanganiso zenguqu ezilamathimu azaphatheka kumidlalo ka2017 ezweni leGabon ukuthi umvuzo usukhuphuke ngesilinganiso se-166%. Iqembu elizadliwa ku-final yenkezo le lizaphiwa i$2 miliyoni. Amazwe azadlala kuhlandla lama-semi-final azabuyela ekhaya ebambe i$1 miliyoni.
Iphephandaba likazulu lixhumane loMahachi ngoLwesithathu lapho akhulume kabanzi ngokujabula ukuthi usephendukile ukuzodlalela isizwe kulandela ukulimala kwakhe isandla kunyanga ezedluleyo.
“Ukubizwa kwami eqenjini kutshengisa ukuthi umqeqetshi uyangethemba. Ngokwami ngiyajabula ngoba mhla ngilimala isandla kumele siyedlala leGuinea ngezwa ubuhlungu. Loba khathesi sidlala okobungane leTanzania, kufana lokuthi ngumdlalo we-final esiwulandayo ngempelaviki.
“Ngijabule okwamagama. iTanzania kayisoze yalibona kulumdlalo. Yiso isikhathi okumele sivuse iqembu, labandeli bethu basisekele ngamandla,” kutsho uMahachi.
Umdlali lo ubike ukuba ukuze amaWarriors adlale kuhle kuAfcon kumele kugcwale usekelo lwabalandeli lokuthola imidlalo yobungane eminengi lamazwe aqinileyo kunguqu.
“Singaqhubeka sithola imidlalo yobungane lamazwe amakhulu kunguqu, angiboni siphelela eduzane kuAfcon. Imali le engumvuzo we$4 miliyoni ngeyamaWarriors. Nxa sizethemba ngokupheleleyo, sizakubazintshantshu.
“Angiboni ukuthi singehlulwa yini ukuthi siqedelane lamanye amathimu.”
UMahachi ukhulume lokhu ngesikhathi elubhekise esigodlweni lapho amaWarriors azalolonga ngaphansi komqeqetshi uCallisto Pasuwa.
Kusenjalo imbiko ephuma ebulenjini ithi iTanzania layo yethusela ukutshiya iswabise amaWarriors.
Nampa abadlali ababizwe nguPasuwa:
Onozinti: Donovan Bernard (How Mine), Tatenda Mkuruva (Dynamos), Nelson Chadya (Ngezi Platinum).
Imvimbi: Onismor Bhasera (Supersport United), Hardlife Zvirekwi (Caps United), Bruce Kangwa (Azam FC), Lawrence Mhlanga (Chicken Inn), Teenage Hadebe (Chicken Inn), Tendai Ndlovu (Highlanders), Oscar Machapa (AS Vita Club).
Abaphakathi: Willard Katsande (Kaizer Chiefs), Marvelous Nakamba (Vitesse Arnhem), Marshall Mudehwe (FC Platinum), Raphael Kutinyu (Chicken Inn), Danny Phiri (Golden Arrows), Kudakwashe Mahachi (Golden Arrows), Khama Billiat (Mamelodi Sundowns).
Abagadli: Knowledge Musona (KV Oostende), Mathew Rusike (Helsingborgs IF), Tendai Ndoro (Orlando Pirates), Cuthbert Malajila (Bidvest Wits), Philana Tinotenda Kadewere (Djurgardens IF),Nyasha Mushekwi (Dalian Yifang).
Online Reporter