admin
Fairness Moyana
KULESISEBENZI senkampanini yeHwange Colliery esizahlala sithuka ilanga lapho esakhetha ukunxusa ngalo umahotsha emzini waso nanko phela wathi ephaphama ngemva kokuncinda uluju lwemvelo wathola esenyamalale lemali edlula iR2 000.
UMnumzana Peter Syalumba wanxusa uTendai Moyo ohlala kuF1C Lwendulu eHwange, mhlaka 6 Mbimbitho ebusuku ukuba bazijabulise ndawonye eJabulani Beerhall.
Ngemva kokuba esedle amabele kakhulubaqonda emzini wakhe bayalala, wathi ephaphama emadabukakusa wananzelela ukuba uMoyo wayesemtshontshele imali engange R2 100 ayelayo.
Umtshutshisi uRangarirayi Garanje uveze ukuthi uSylumba wakhumbula konke okwakwenzakele waselanda uMoyo yena ongazange akulandule ukuthi uthethe leyomali lanxa iR400 wayesethenge ngayo umakhalekhukhwini.
USylumba wabikela amapholisa ahle ambopha. Emthethwandaba uMoyo ubulalise inkundla ngembambo lapho ethi yena ufuqwe yimoya emibi ukuthi athathe imali engaphiwanga.
“Mhlonitshwa, angazi ukuthi bengingenwe yini ngitshontsha, kodwa ngicabanga ukuba bengifuqwa yimoya emibi.
Ngicela inkundla ingixolele ngesenzo sami,” kutsho uMoyo
Umantshi uNkosikazi Portia Mhlanga kazange akutshaye indiva lokho ngoba uhle wamgweba inyanga eziyisitshiyagalolunye, wasemephulela inyanga eziyisithupha kukhangelelwe ukuthi asebenze amahola angu-210 kungelambhadalo.
Kukanti inyanga ezimbili eziseleyo umantshi uthe kumele abisele uSylumba imali yakhe i-R1 700 nxa engekela uzangena ejele okwenyanga ezimbili.
Online Reporter