admin
Samkelo Tshuma
KULENINA elihlala elokitshini leMzilikazi koBulawayo elibulele inkonyane yalo ngokukhipha isisu layiphosela enkonxeni yamanzi lisenzela ukuba ihitshwe ife masinyane.
Inina leli, uPetronella Mlalazi oleminyaka yokuzalwa engu-32 wenze ihlazo leli mhlaka 2 Mabasa ngesikhathi ekwabozala.
Umsolwa kubikwa watholwa ngumamangala uShadreck Moyo ngesikhathi esenza isihluku lesi.
Umtshutshisi wecala leli uTaurai Hondoyemoto ubikele inkudla yeTredgold koBulawayo kuyonale iviki ukuba umsolwa wenza icala leli ecabanga ukuba kasoze abanjwe engazi ukuba okulempondo akufihlwa emgodleni.
Inkundla izwe ukuba ngosuku lolu umsolwa wasuka ngakibo elokitshini leNjube waya kwabozala lapho athola khona kulomamangala. Ekufikeni kwakhe kubikwa wanatha iphilisi lokukhipha isisu. Ngemva kwesikhatshana wahelelwa wasebeletha.
Kuzwakale ukuba inkonyane le yayiphila ngesikhathi izalwa njalo kwasokusele insuku ezimbalwa ukuba ibelethwe.
Ngesikhathi umsolwa esebelethile kubikwa wathatha inkonyane le wayivalela phakathi kwenkonxa eyayilamanzi.
Umtshutshisi lo uqhubekele phambili wathi umsolwa waphinda wayithatha wayiphosela phakathi kwe-chamber esambuzini ngenjongo yokuyibulala.
Khonokho kubikwa umamangala walandela umsolwa esambuzini lapho amthola ezama ukuthela amanzi esenzela ukuthi ihambe.
Umamangala wabika udaba emapholiseni okwabangela ukuba abotshwe. Ebuzwa ngumantshi uNkosikazi Sibongile
Msipha-Marondedze umsolwa ulivumile icala lakhe wathi wakwenza lokhu ngoba esesaba ukunakekela umntwana.
Umsolwa utholakale elecala lokubulala. Umantshi umgwebele ukwenza i-community service okwamahola angu-210 enkambeni yamapholisa eNkulumane.
Online Reporter