Online Reporter
Umculi weSouth Africa uMakhadzi usenxuse ubunye kuma-Afrika ngemva kokuvela kwembiko yokuthi abanye abagqugquzeli bemicimbi beZimbabwe bafuna abaculi beNingizimu Afrika bavinjelwe ekunandiseni eZimbabwe.
Lokhu kuza ngemva kokusabalala kwemikhankaso enxusa abokufika kweleSouth Africa ngokungekho emthethweni ukuba babuyele emakhaya, okuthinte kakhulu abantu beGhana, Malawi, Zimbabwe kanye leNigeria.
UMakhadzi, ungomunye wabaculi abamenywe ukuba banandise kumkhosi weCheso Power eZimbabwe mhlaka 31 Ntulikazi. Lo umcimbi uhlelwe nguphromotha uPartson “Chipaz” Chimbodza ebambisene labaphathi bakaMacheso. Abantu abanengi beZimbabwe bakhala ngabahleli bemicimbi abakhonze kakhulu imali kunemizwa yabo. Lokhu kungemva kokuvela kweziphakamiso zokuthi akumiswe unxuso lukaMakhadzi kulo mcimbi.
Le ntokazi inikele enkundleni yokuxhumana iFacebook ifaka uqwembe olukhuthaza ubunye kuma-Afrika.
Baphawule kanje abalandeli bakhe:
Naryk Bambaus: “Makhadzi, ungakhathazeki, abantu abakuzondi, kodwa ngenxa yesimo samanje, angicabangi ukuthi ukwenza umcimbi eZimbabwe kungumqondo omuhle. Empeleni akuphephile; abantu bathukuthele, bazama ukwelapha izinhlungu zabo lokuthola ukuthula. Ngakho-ke, ukwenza umcimbi eZimbabwe kufana lokusikhumbuza ngalezo zinhlungu ngendlela ebuhlungu. Ake kuzole isimo kuqala. Kodwa nawe, awesabi yini ukuza eZimbabwe kulesi simo?”
Shumbakadzi Yekwa Mzambi: “Inkinga ukuthi uma useZimbabwe uzobe ucula phambi kwabantu baseZimbabwe, hayi abaseNingizimu Afrika… yibo kanye laba bantu baseZimbabwe abanabafowabo labodadewabo abahluphekayo emigwaqweni yaseNingizimu Afrika… uyangizwa ukuthi ngithini? Siyakuthanda kakhulu, kodwa linda kuze kwehle umimoya.”
