admin
Msilisi Dube
KUTHOLAKALE isidumbu siqunywe ikhanda saphoselwa eceleni komgwaqo kusihluku esitshiye izakhamizi zeMawabeni zikhuza umhlola kuviki ephelileyo.
Kucatshangelwa ukuthi umuyi ongowesilisa okungasatholakalanga igama lakhe engabe wabulawa yizigelekeqe zaseziphosela isidumbu sakhe eceleni komgwaqo ngenhloso yokuthi kukhanye sengathi ngumuntu ofe engozini yomgwaqo.
Indoda le kucatshangelwa ukuba yabulawa ngabangane bayo ngoLwesihlanu ntambama.
Umfakazi oqotho ongathandanga ukulotshwa igama lakhe uveze ukuthi undoda lo osengumuyi kukhanya watshaywa ngabangane bakhe ngoba ikhanda lakhe litholakale licobodisiwe lentamo isikiwe.
“Lokhe ngathwetshulwa yingwe angikaze ngibone into eyesabekayo kangaka. Indoda le kukhanywa yayitshaywa ngamatshe ngoba ikhanda layo lalimanxebanxeba njalo lingani like latshaywa ngento elesisindo ngoba lalicobodisiwe. Kukanti intamo yona kwakukhanya sengathi isikwe ngesikhali esibukhali. Umzimba wayo wawugcwele imvimvinya njalo lapho okwakulesidumbu kwakulemitshudutshudu,” kutsho lesisakhamuzi.
Isakhamuzi lesi siqhubekele phambili sathi kucatshangelwa ukuba umuyi ebengumakorokoza njalo engabe ebulawelwe igolide.
“Isizatho sokubulawa kwakhe asivelanga kodwa sicabangela ukuba mhlawumbe wabulawelwa igolide njengoba engumakorokoza. Ababulali abakaziwa ukuthi ngobani,” kulandisa lesisakhamuzi.
Esinye isakhamuzi esithande ukwaziwa ngokuthi nguJohn Mpofu uveze ukuthi abantu bakibo sebegangile.
“Ngiluzwile udaba lwendoda etholakale iqunywe ikhanda eMawabeni.
“Impicabadala efana lale kayiqali ukwenzakala, abantu besigabeni sakithi sebegangile kakhulu ukhona omunye oke wabulawa futhi umakorokoza,” kuchaza uMpofu.
UKhansila kawadi 2 uNqabeni Nkala uthe kulesidumbu sendoda esitholakale sicobodiswe ikhanda kodwa kukhanya sengathi wagxotshwa yimota lanxa umtshayeli wakhona engakabotshwa. Uphinde waveza ukuthi umuyi ungcwatshwe ngoMvulo.
Omele isikhulumi samapholisa esabelweni seMatabeleland South, uAssistant Inspector Thabani Mkhwananzi uthe bamukele udaba lwendoda egxotshwe yimota eMawabeni.
“Samukele umbiko wendoda efe eMawabeni ngemva kokugxotshwa yimota kodwa silokhu sidinga umtshayeli owenza lokhu.
“Sithanda ukukhuthaza uzulu ongabe elolwazi ngokwenzakala kumuyi ukuthi angathandabuzi ukufika emawofisini ethu njengoba silokhu sisachwayisisa ngodaba lolu njalo silindele incwadi evela kudokotela ngemva kokuhlolwa kwesidumbu,” kulandisa uAsst Insp Mkhwananzi.
Online Reporter