adminCharity Moyo
ZISELE zibambe eyangaphansi izakhamizi zeMberengwa eBvumbura ngemva kokuba umalukazana obezobona umuzi evuke esemathuneni, uMthunywa ukuzwile lokhu.
Isiga lesi senzakale ngoLwesine kuviki ephelileyo.
USanangurai Shoko, 29, utshiye izakhamizi zeMberengwa zinathisana itiye ngesiga sokuvuka kwakhe ethe qotshotsho emathuneni emzini kaTeddias Dube.
UShoko kubikwa ubefuna ukuthathwa nguTonderai Dube (34).
UmkaShoko ebona lokhu kazange athande ukuphozisa amaseko kodwa uhle wabopha imitshaqana yakhe wathi kafuni kumbona futhi.
Umfakazi oqotho uMnumzana Cain Masaga uveze ukuthi imuli yakoDube yayibhadale onke amalobolo ngenhloso yokuthi uTonderai loShoko batshade kodwa kucine kusehlula ngoba ijaha lithe ngeke lihlale lomuntu ovukayo ebusuku.
Uveze ukuthi ngelanga kusenzakala linkemenkeme uShoko labakibo babezobona umuzi.
Uqhubekele phambili eveza ukuthi kwaba ludaba olwadida abantu bonke ukuthi angabe wayedingani emangcwabeni umalukazana.
Kubikwa uyisekazi kamakoti wavuka ekuseni edinga uShoko ukuze benze imisebenzi yekhaya njengokuqhutshwa kwesiko kodwa kazange ambone endlini waze wayatholakala emathuneni ngemva kwezindlu.
“Umakoti ebuzwa ukuba udingani emangcwabeni uthe laye kakwazi ngoba uzibone elapho ephaphama,” kutsho uMnu Masaga.
Imuli lezi ezazisakha ubuhlobo zihlala esigabeni sinye kungakho abazali bentombi babizwa labo ukuze bezobona insindabaphenduli le.
UMthunywa uxhumane loMnumzana Phineas Shoko onguyise kaSanangurai othe kuliqiniso ukuthi umntanakhe wavuka esemangcwabeni esiyabona umuzi wakwabozala njalo lokhu emadolonzima ngesehlakalo lesi.
“Kuliqiniso lokhu kodwa lami ngeke ngitsho ukuthi kwahamba njani njengoba sabizwa sokuthiwa sizobona lokho osokwenziwe ngumntwana.
“Ngibuhlungu kakhulu ngoba besesakhe ubuhlobo obukhulu lemuli yakoDube, pho lihlazo elinganani leli.
“Abantu bayakhuluma intando yabo, umntanami useyaliwe emendweni ngoba bathi ngeke bahlale laye enje,” kulandisa uMnu Shoko.
Uveze ukuthi uzadingisisa kabanzi kubosiyazi ngoba yena kabakwazi ukuthi emulimi yabo kuyathakathwa. Ubuye wathi kuyenzeka ukuthi ukhona owagangela umntanakhe ngesizatho sokuthi angendi.
Intatheli ibuye yakhulumisana loNkosikazi Sandra Dube, umamazala kaShoko, yena oveze ukuthi kuliqiniso kodwa yena kakukho angakutsho ngoba kakwazi laye ukuthi kwabangelwa yini ukuthi umalukazana wakhe enze njalo.
“Kwenzakala sibili ukuthi umalukazana wavuka elele emathuneni kodwa mina angingeke ngakhuluma okunengi, sokudinga imuli yakoShoko ukuthi ikhulume njalo ilungisise lakho okuhluphayo.
“Umntanethu usesala ukumthatha kodwa sizazama ukukhuluma laye ngoba kuyatholakala empilweni,” kutsho uNkkz Dube.
Online Reporter