Online Reporter
Nkosilathi Sibanda
KUDABA oludabukisayo, kulendoda yeGwanda, eMatabeleland South, eyenza uchuku ngokudlwengula umzukulu wayo ngesikhathi somcimbi wemuli.
Indoda le, eleminyaka engu-55, yadlwengula umzukulu lo oleminyaka engu-14 yokuzalwa. indoda le miswe phambi kukamantshi lapho egwetshwe khona iminyaka elitshumi lanhlanu ejele.
I-National Prosecuting Authority of Zimbabwe ibike ukuba isehlakalo lesi senzakala ngoNhlangula ngomnyaka ka-2025 ngesikhathi kuqhutshwa umcimbi wemuli. Umzukulu wayehamba lonina.
“Ngesikhathi somcimbi, unina womntwana watshiya usane lwakhe olumunyayo ekamelweni lukamalume. Lo owadlwengulwayo wayecelwe ukuthi akhangele usane.
Kubikwa umsolwa wangena ekamelweni wathola umzukulu wakhe ehlezi esitulweni. Wadonsa umzukulu wakhe, wamhlubula impahla, qede lapho wamdlwengula. Ngemva kokwenza lokhu, wethusela ukumhlukumeza nxa engaveza okwenzakeleyo,” kubika iNational Prosecuting Authority of Zimbabwe.
Kubikwa udaba lwavela ngoNhlolanja 2026 ngesikhathi unina womntwana odlwenguliweyo enanzelela utshintsho emzimbeni womntwana. Kuthe ebuza, umntwana wabika ukuthi usezithwele.
Kwabikelwa amapholisa, kwaba yikubotshwa kukamalume.
“INational Prosecuting Authority of Zimbabwe ixwayisa bonke abenza amacala okudlwengula ukuthi isandla somthetho sizabafinyelela.”
