Online Reporter
INGXABANO yenye imuli isivele egcekeni kulandela ukuba inina elisebenzela eBotswana lisola unina ngokuphatheka ku-Satanism kunye lokungenisa abantwabalo kulolukholo.
UTatenda Munjoma wesigabeni seGandayi ngaphansi kwenduna uZimunya, eZimunya ubekhanya ekhathazekile ehlezi eceleni kwezikhwama ezipakitshiweyo labantwabakhe abathathu elungela ukubana abatshiye emzini kanina eChigodora.
“Ngikhathele, impilo yami ayihambi kuhle, khathesi ngifuna ukuyakhalala abantwana emzini kamama ukuze enze lokhu akufunayo ngabo,” kutsho uMunjoma.
Inina leli elikhathazekileyo lethesa unina uRose Chishiri ngokuphatheka ku-Satanism, ubuthakathi kanye lokuletha undofa empilweni zabo.
“Umama ngumthakathi njalo selilunga le-Satanism. Sowangenisa abantwabami abathathu kikho. Ngaleso sizatho usengilalisa labondofa abasihlukuluza nsuku zonke. Abantwabami abenelisi ukulala. Bayahlaba umkhosi bathi babona abantu besenza imithanithani phandle,” Munjoma.
Ubuye wachaza ngesehlakalo esitshwaqisa umzimba esenzakale ngobusuku obedluleyo: “Izolo indodakazi yami ingivuse phakathi kobusuku isithi kulabantu ababasa umlilo phandle kwegedi besenza imithanithani. Ngathi ngifika ngabona kuchelwe igwayi yonke indawo lomlotha lapho obekubaswe khona umlilo,” utsho njalo.
Ubuye wangezelela wathi abantwabakhe abathathu abaleminyaka ethi 15, 12 le10 abasayi esikolo ngenxa yokuhlaselwa yimomoya esukunyiswa ngunina.
“Indodakazi yami endala yayingasaziphathi kuhle esikolo, yayithethisa ababalisi, idinga abantu ukuthi bazenze abazali bayo nxa kuthwe sibuye esikolo, waphosa waxotshwa yikho ngacina ngitshela abakhokheli besikolo ukuthi wayengazenzi kodwa lokhu kwakubangelwa ngumama. “Abantwabami bonke bobathathu kabasaziphathi njalo labantu sebebanenela khatshana ngesizatho semimoya le ebahlaselayo.
Abantwana laba kubikwa bayake bazame ukuzibulala.
“Bathi bafuna ukuzibulala, bathi kulamazwi emakhanda abo abalaya ukuthi bazibulale. Ngehluleka ukuthola usizo, sengivakatshele osiyazi abanengi lamabandla atshiyeneyo kodwa akukho okusebenzayo,”.
Indodakazi endala ikhuluma lentatheli iqinisekisile ngezimanga lezi enzenzakala ngakibo.
“Kugcwele inyoka ndawo yonke, siyazibona evulandini, endlini yokugezela langaphansi kombheda. Kwesinye isikhathi ngivuka ngikhanyiwe kuyabe kungani kulento enzima ehleli esifubeni sami,” utsho njalo.
Kusenjalo uChishiri ulandule konke akwetheswa yindodakazi yakhe ethi kubangelwa yindodakazi yakhe.
“Ngibona angathi izenzo zakhe ezimbi sezimphendukela. Ngesikhathi eseBotswana angabe wadinga imithi efuna imali kumbe njalo waba lilunga leSatanism akhuluma ngayo.
“Khathesi sebemlandela yena labantwabakhe,” kutsho uChishiri.
Ubuye wengeza wathi uMunjoma wayetshiya abantwabakhe isikhathi eside bebancane.
“Ngondla abantwana laba kusukisela belenyanga ezimbalwa, aluba ngangifuna ukubalimaza kambe ngabe kangibalimazanga kudala yena eseBotswana na.
“Wayefulathela abantwana aphenduke kuphela nxa esesizwa sokusitsho.
UChishiri ubuye wagcizelela ukuthi wake wancedisa indodakazi yakhe ukuthi ithole usizo.
“Ngangihamba laye kubosiyazi labaphurofethi kodwa kwacina kusiba ngumthwalo kimi, ngekela. Yikho lapho aqala ukungithi ngingumthakathi njalo ngili-Satanist. Wangiphendukela ngoba sengale ukubayingxenye yakho,” kuchasisa uChishiri andubana achaze ukuthi indodakazi yakhe iphile kuhle engqondweni.
“Kaguli kodwa udidekile, futhi kahloniphi. Ngeke ngivume umntanami esithi ngingumthakathi. Kasesiyo ndodakazi yami, angisamfuni emzini wami,” kuphetha uChishiri.
