Online Reporter
Nkosilathi Sibanda
KULESIDINGO sokuthi kuthuthukiswe imfundo yokulondolozwa kwemvelo ezikolo, ukuze abafundi bakhule belolwazi olujulileyo futhi benelise ukwaba ulwazi lolu kumphakathi jikelele.
Inkuthazo le iphume ngesikhathi kunanzwa iWorld Environment Day leDesertification and Drought Day, esikolo seMafakela Primary. Umbuthano lo ubuqoqwe yi-Environmental Management Agency (EMA).
Ukunanza kwamalanga la kuyisiqiniseko samazwe wonke, kulandelwa ama-Sustainable Development Goals (SDGs) agxile ekulondolozeni imvelo ku-United Nations.
Indikimba yalonyaka ngethi: “Silwisa ingcekeza ye-plastic.” Kulumbuthano bekuthe gwaqa abantwana besikolo, abazali lamaqula abona ngokugcinwa kwemvelo emphakathini asemalokitshini leMagwegwe, Luveve le-Queenspark.
Umhlonitshwa welanga, umsekeli kamqondisi wezemfundo koBulawayo uMnumzana Thabani Sibanda uhlanyele isihlahla soMnyi phakathi kwesikolo. Kuhlanyelwe lezinye izihlahla esivandeni
UMnu Sibanda ukhuthaze abantwana besikolo ukuthi bathakazelele ukulondolozwa kwemvelo, eveza ukuqakatheka kokuhlanyela izihlahla.
Ikusasa lomhlaba wethu ligxile kulokho esikwenza khathesi. Njengabatsha, lilomsebenzi oqakathekileyo okumele liwubambe ekukhuthazeni uzulu kunye lokuvikela imvelo yethu,” kutsho uMnu Sibanda.
Ukuhlanyela izihlahla kumayelana lokuqinisekisa ukuthi izizukulwane ezizayo zizathola umhlaba umuhle. Njengabafundi, kubalulekile ukuzwisisa ngokubaluleka kokulondolozwa kwemvelo.”
Iqula labafundi eleMafakela Primary School Environment Club, ebelikhona kulumbuthano, libike ngokuzimisela ukuhlanyela izihlahla egcekeni lesikolo lakwezinye indawo eLuveve.
