Online Reporter
YiNtatheli kaMthunywa
KULENDODA yesiqintini seMashayabvudzi eMvuma, esabelweni seMidlands, okubikwa ibulele iloja layo ilisola ngecala lokuthandana lonkosikazi wayo.
Lokhu kubikwa kwenzakale mhlaka 31 Zibandlela.
Isikhulumi samapholisa esabelweni seMidlands, uInspector Emmanuel Mahoko, uthe uAleck Chaminuka (25) ongumasitanda walapho obekuhlala khona umuyi, uTanaka Musiiwa (24), wafika endlini ebusuku mhlaka 31 Zibandlela ngesikhathi sika 8 ntambama evela eChivhu lapho asebenza khona, yikho lapho okwaba lokungazwisisani khona.
“Umetheswacala uAleck Chaminuka wafika evela eChivhu lapho ayesebenzela khona wafica umkakhe, uCaroline Hofisi (23), engaphekanga ukudla kwantambama wathi usanda kufika uvela esontweni.
Ababili laba baqala ukuxabana ngenxa yendaba le, okwabangela ukuthi umkakhe ayecatsha kuTanaka Musiiwa lapho afika wamukelwa nguPortia Dzigahwi (19) ongunkosikazi kaTanaka Musiiwa,” kutsho uInsp Mahoko.
Kubikwa unkosikazi kaTanaka wabikela umkakhe, ngokuxabana kukaChaminuka lonkosikazi wakhe.
“Ngesizatho sokuba uTanaka Musiiwa, wayengekho ngesikhathi ababili laba beqala ukuxabana, wafika endlini ngehola lika 8. Ngaleso sikhathi uChaminuka waqala ukumethesa icala lokuthandana lonkosikazi wakhe.
Ababili laba baqala ukuxabana amanina la esendlini kaMusiiwa, uChaminuka wathatha ingqamu wagwaza uMusiiwa kanye,” kuchaza uInsp Mahoko.
Uthe omakhelwane bagijimisela uMusiiwa esibhedlela seMvuma District Hospital lapho afika wafa engakelatshwa.
“Indaba le yahle yabikwa emapholiseni eMvuma, uChaminuka wabotshwa. Njengamapholisa, siyaqhubeka sikhuthaza uzulu ukuthi nxa kungaba lokungazwisisani kabatshiye umkhuba wokulwa kunye lokubulalana kodwa kabadinge abangabancedisa ukuthi bakhumisane umlotha,” kutsho uInsp Mahoko.
