. . . Uthi inkezo yamasotsha ngeyakhe

NGESONTO iHighlanders yamukela ithimu eyesatshwayo kulisizini, iHow Mine kumqhugelwano wehawu lamasotsha iZNA  charity.
Okuhlabusayo ngomdlalo lo yikuthi iHow Mine iphethe abadlali abalobungcitshi obuphezulu kuleBosso. Kubadlali laba kulequla eselitshibilike enkundleni okweminyaka eminengi.

IHighlanders labafana bayo abasacathulayo   kunguqu, ilakho ukuthwala nzima emagumeni. Abagadli beHow Mine ababalisa uKuda Musharu, Charles Sibanda, Timothy January loHeritani Masuku abadlula becimezile egedini leHighlanders.

Ngesiqubu esiphethwe ngabafana laba, kuzamele imvimbi zeTshilamoya zingene zibophile enkundleni.

Umfana otshayisa onozinti beHighlanders ngovalo uLimited Chikafa kubikwa ulimele ngakho-ke kasoze adlale.

Ngemuva, uMasomere kethuswa yilutho nanko phela ukaputeni wakhe uGilbert Banda ulakho ukuvala ngci encedisana loDevon Chafa. UMasomere uveze ukuthi uChafa useyimvimbi ezathokozisa abanengi.

LoTawanda Muparati osethe Khwatshu ngemva kwesizini engenzi lutho, uzethusela ngokugijima kwakhe eceleni kwenkundla.

Abagadli beBosso uThomas Chideu loGabriel Nyoni kukhangelelwe ukuthi balibambe ibhola baphange ukulithela ngoba uBanda loChafa abasoze bavume ukuyangiswa ngabafana laba. U-Obadiah Tarumbwa nguye yedwa othenjiweyo ukuthi afuqane lemvimbi ezinkulu zeHow Mine.

Umqeqetshi weHighlanders uBongani Mafu ulomthwalo wokusukumisa abasekeli bethimu yakhe abalokhe bengakholwa ukuthi uzayiguqula ithimu le.

Lo ngumdlalo wakuqala phakathi kwamaqembu la lonyaka. Umqeqetshi weHow Mine uLuke Masomere ubike ngokuzethemba ukuthi iHighlanders uzatshaya ayiphendulele.

“IHighlanders sizadlula phezu kwayo eBarbourfields. Umdlalo lo uzatshengisa amanye amathimu ukuthi iHow Mine ilande ukuzonqoba kuphela.

“Abafana bami babophe yonke indawo, njenge-defence angikhulumi okunengi ngayo,” kutsho uMasomere.

Umqhugelwano wehawu lamasotsha lo udlalewa ngamathimu amane. IDynamos izadlala lomakhelwane wayo iCaps United khonale leHarare ngelanga elifanayo.

Izimbamgodi iFC Platinum yanqoba ngomnyaka odluleyo kodwa ayidlali lonyaka ngoba kumele iqhubekele phambili kumkhankaso wayo wenkezo yeCaf Confederations.