Online Reporter
Brandon Moyo
KUZE kwabamhlophe empilweni yomdlali wekhilikithi u-Ernest Masuku nanko usebizwe kuqembu lelizwe amaChevrons.
Umdlali lo ukuluhlu lwabadlali abazaphatheka kumidlalo emibili yama-One Day International (ODI) leSri Lanka, eHarare Sports Club kusukela ngoLwesihlanu.
Ukudlala kwakhe kuqembu lamaTuskers, engu-fast bowler kumkhuphukise izinga, wabonakala kubacuphi babadlali. Ungomunye wama-seamers adlala ngendlela efaneleyo, okumele abizwe eqenjini lelizwe.
Ubonakale kumidlalo yePro50 Championships lapho abelesilinganiso se19, ethola ama-wicket angu- 14 kuma-innings ayisithupha.
UMasuku, oleminyaka yokuzalwa engu-32 wadlala kuhle njalo lapho ebizwe kuZimbabwe A idlala leScotland XI.
Kumidlalo emibili wakhokhela ngokuba ngumdlali owathola ama-wicket ayisitshiya galolunye.
Abanye abadlali abatsha kumaChevrons nguBrad Evans, Tony Munyonga loClive Madande.
Iqembu lizabe lisamukela loBrendan Taylor, owacina ukubonakala kuma-ODI ngo2021.
Ukaputeni nguCraig Ervine.
Isikhulu kuqula salabo abakhetha iqembu, uDavid Mutendera uthe iqembu elizadlala lihlangene ithalenta elidala lelisacathula.
Samukela uBrendan Taylor eqenjini. Leli liqembu elihlangene ithalenta lobutsha.
Silethemba bazakwenza ngcono,” kutsho uMutendera.
Umqeqetshi uJustin Sammons uthe: “Sivela kumdlalo webhola elibomvu, khathesi sesingena kukhilikithi yelanga elilodwa.
Sidlala leSri Lanka eqinileyo kubhola elimhlophe ngakho kumele siqaphele.”
Iqembu lamaChevrons liphelele:
Craig Ervine (Captain), Brian Bennett, Johnathan Campbell, Ben Curran, Brad Evans, Trevor Gwandu, Wessly Madhevere, Clive Madande, Ernest Masuku, Tony Munyonga, Blessing Muzarabani, Richard Ngarava, Newman Nyamhuri, Sikandar Raza, Brendan Taylor, Sean Williams.
