admin
Ethel Ncube
KULOMBALISI weMatanamombe eGwanda ophenduke umhlanga kulandela ukuthi athi edobha ukhuni ngesikhathi etheza kuvumbuluke isidumbu, uMthunywa ukuzwile lokhu.
Isehlakalo lesi senzakale ngeviki ephelileyo lapho omunye wababalisi wesikolo seMatanamombe Primary ethe ephakamisa ukhuni kwavumbuluka isidumbu ngaphansi okwenze wabuyela emuva wayabikela umphathisikolo yena owahle wabiza amapholisa.
Esinye isakhamuzi esikhulume loMthunywa uMnumzana Lukang Dube uveze ukuba umbalisi wahlangana lendaba engakhulumekiyo ezithezela inkuni.
“Umbalisi lo wahamba egangeni duze nje kwesikolo esiyatheza inkuni, uthe esegangeni wathi edomba inkuni wavumbulula isidumbu somuntu wesilisa.
Uthe ebona lokhu wacela ezinyaweni ngenxa yokwethuka.
“Wagijima wayabikela umphathisikolo ngayesehlangane lakho egangeni, umphathi wahle waqonda emapholiseni ukuyawabikela okuyibo abathwala isidumbu.
Ukuthi umuntu lo kwahamba njani akula okwaziyo, wabonakala esefile.
“Abasiki bebunda bathi mhlawumbe wathathwa ngamanzi echapha kwelinye icele lomfula,” kulandisa uMnu Dube.
Uqhubekele phambili waveza ukuthi umuyi lo abantu abanengi bathi abamazi.
“Umuntu lo ngesikhathi ethwalwa ngamapholisa akula owavezayo ukuba uyamazi. Abantu bakhanya bengamqondi kuhle ukuthi ngowangaphi lokuthi angabe ebulewe njani kumbe ezifele,” kutsho uMnu Dube.
Intatheli ibuye yaxhumana lesinye isakhamuzi uNkosazana Boniwe Nare ochaze ukuba kuliqiniso ukuba kulomuntu owatholakala efile egangeni ngumbalisi owayetheza inkuni.
“Umbalisi lo wayetheza inkuni egangeni cala celeni wathi edobha ukhuni lwamtsaya lwameqa uvalo esedibane lesidumbu wahle wasuka lapho ebaleka esiyabikela abanye ngalokhu ayekubonile.
“Ngesikhathi isidumbu sibonakala sasingathi sesisonakala okungabe kuyikho okwenza abantu behluleka ukubona ukuthi ngubani,” nguNkszn Nare lowo.
Intatheli ixhumane lesikhulumi samapholisa eMatabeleland South uInspector Loveness Mangena uthe basaphenya ngodaba lolu.
Online Reporter