admin
Mehleli Dube
UMFUNDISI ngumuntu inengi esikholelwa ukuthi usondelene kakhulu loMvelinqangi njalo esebheme wakholwa kunkanuko zomhlaba.
Loba umuntu esengene enkingeni ezisinda ukwedlula umthwalo kaTholakele sikholelwa ekuthini nxa uthandazelwe ngumfundisi wakusondeza eNkosini uzwa umuntu esetshaywa ngumoya, ngoba lelijogwe likaSathane ayabe eligaxile esemphumuzile.
Inkinga isuke ibekhona ukuthola umfundisi esethandazela umzalwane bebobabili ikakhulu nxa kungumzalwane wosapho lukaEva. Phela inengi lamabandla akulezinsuku kuthandazwa umuntu ebanjwa amahlombe lekhanda.
Nxa kungenzeka ukuthi umuntu afike evela emsebenzini loba lapho ayabe evela khona athole umfundisi ebambe umkakhe amahlombe kumbe ikhanda, kudala ingxabano, khona nxa kuyikuthi umkakhe ngophuza ugologo kuvele kuchitheke izitshebo esebulawa yibukhwele esecabange waze wajula.
Kwakube kuhle ukuthi umfundisi nxa ezakuya fakela umzalwane umthandazo endlini ahambe lomkakhe ukwenzela ukuthi lanxa umkakhe ethutsha nxa echaza ukuthi lo ngumfundisi wakhe lomkakhe ulaka lesikhwele kudede.
Amadoda amanengi kangeni nkonzo zabomkabo yikho abafundisi babomkabo bengabazi. Yikuthi isikhathi esinengi uthola umama walapha ekhaya esehlonipha umfundisi ukwedlula umkakhe, lokupheka lelolanga kuzaphekwa okumnandi ukwedlula ukudla kwehoteleni. Nxa umfundisi ezabuya qala utshele umkakho uzwe ukuthi uzathini, loba nje ezakwala engavumelani lakho kodwa uyabe esekwazi.
Khona kuba kuhle ukuthi umkakho ngelinye ilanga umcele uhambe laye enkonzweni yakho loba ezahlala imizuzwana. Yebo siyazi sonke ukuthi umfundisi ngumuntu ohloniphekayo, kodwa nxa ebiziwe ukuzofaka umthandazo keze lomkakhe, loba ezothandazela umazakhela lokhu kunqabela ukuthi umkamfundisi laye angazidli nhliziyo.
Singakhohlwa ukuthi ubukhwele buhlasela loba ngubani.
Ayixabene.
Umlobi uthinteka ku 0714355641
Online Reporter