Online Reporter
KULEMULI esele itshaqekile kulandela ukutholakala kowesifazane efile ekamelweni lakhe lokulala.
Isidumbu salo owesifazane sitholakale siphakathi kwechibi legazi emzini wakhe eLonely Park Village, eMahikeng eSouth Africa.
UMasego Mashewu (39) okubikwa ukuthi ubengumbalisi kwesinye isikolo esiseMahikeng kucatshangelwa ukuthi ubulewe ngumkakhe.
Elinye ilunga lemuli lithe uMashewu wabulawa ngesando kanye lescrewdriver.
“Ngokubona kwethu ubulewe watshiywa ephakathi kwechibi legazi okwesikhathi eside. Besisehluleka lokungena endlini ukuze simbone kodwa mina ngize ngabalesibindi ngangena ngambona,” kutsho isihlobo lesi esingathandanga ukuqanjwa ngebizo.
Kusenjalo isikhulumi samapholisa eNorth West uInspector uSipho Taliwe uqinisekise ukuthi amapholisa abizwe kulindawo ngezikhathi zehola lika 5.
UTaliwe uthe amapholisa afika kulindawo afica amalunga emuli kanye labe ambulensi abasebeqinisekise ukuthi umuyi kasekho emhlabeni.
Uthe umuyi watholakala ngesinye isihlobo ngemva kokuba abantu bezame ukumfonela kodwa bengamtholi ecingweni.
“Ilunga lemuli leli lacina lisiya emzini kamufi lafica iminyango konke lamafasitela kukhiyiwe. Ilunga leli ladinga izihluthulelo lazithola phakathi kwenye imota eyayisegumeni kodwa ingakhiywanga. Langena endlini lathola umufi elele phakathi kwechibi legazi,” utsho njalo.
UTaliwe wengezelele wathi isihlobo sikamufi lesi sathi singena endlini kamufi yokulala samfica elele phakathi kwechibi legazi.
Amapholisa athe umuyi lomkakhe kubikwa omakhelwane babebazwe bexabana ekuseni ngalolosuku.
“Umka muyi kubikwa wangqikilana lenye imota etshayela ngalolosuku njalo uyelatshwa esibhedlela.
Amapholisa asaqhuba ucwaningo ngokwenzakala kumuyi njalo akhuthaze abantu ukuthi bangasabalalisi imibiko engayisiyo enkundleni zokuxhumana kodwa balinde ona aze aqede ucwaningo. —Ubulembu
