Online Reporter
Sikhumbuzo Moyo
UMBALISI weMilton High School, ophinda abengumfundisi wokholo uTyson Lunga, ubotshelwe ukudlwengula abafundi.
ULunga ungumbalisi wezifundo zama-commercials kubanga le-Advanced Level. Kubikwa ungumkhokheli weScripture Union ezikolo ezinengi.
Abafakazi abaqotho kuloludaba bathe uLunga wadlwengula abafundi, ebaqila ngokubathengela ukudla lokubanika imali ukuthi bengakhulumi.
Okwakhathesi kuthiwa sekumangale abafundi abayisitshiya galolunye njalo inani leli lingakhwela ngokuya kwamalanga.
Kubikwa uLunga ubedlwengula abafundi abakumabanga kaForm One, Form Two labafundi abatsha kulesi isikolo.
Isikhulumi sogatsha lwezemfundo yePrimary leSecondary kuHulumende Mnumzana Taungana Ndoro ugcone isenzo sikaLunga, ebika ukuthi ludaba abaluthathela phezulu.
“Ludaba olukhulu lolu, siluthatha ngomfutho ophezulu.”
Uthe uLunga semiswe umsebenzi njalo sekuqhutshwa uphenyo.
Isikhulumi samapholisa koBulawayo uNomalanga Msebele uqinisekise ngokubotshwa kukaLunga.
Isehlakalo lesi sivele ngeviki edluleyo lapho abafundi baka-Upper Six abale ukufundiswa nguLunga, besithi bayazi ngokudlwengulwa kwabanye abafundi okwenziwa ngumbalisi lo. ULunga kuzwakale ukuthi wasuswa eMagwegwe High loba kungaziwa isizatho.
