admin
Phela usane olungakhaliyo lufela embelekweni Zulu kaNdaba. Satsha bo ngokucitshelwa amandla kagetsi njalonje lakho okungasela mkhawulo. Sicela uHulumende ake angenele lindaba, phela abantu bazacina besonakalelwa yimpahla yabo.
Yebo siyakwazi ukuthi amandla kagetsi kaweneli elizweni kodwa lokhu osokusenziwa yinkampani kaZesa sokwedlulisile. Izifiso zethu thina njengezakhamizi kukhanya uZesa kalandaba lazo.
Enyangeni ezimbalwa ezedluleyo iZesa yakhweza amagetsi ikakhulu kulabo abafakelwa ama-pre-paid meter.
Okudanisayo yikuthi umuntu uyathi ewathengile aphinde njalo athenge igasi ngoba amagetsi ahlala engekho.
Kambe ngubani ongavuma ukuhlala ebhadalela into eze. Thina njengabakaMthwakazi sibuhlungu ngalesi senzo sakho Zesa ngoba okungokwakho siyakunikeza kodwa wena awusathembakali. Thina okungokwethu asisakutholi ngendlela esuthisayo.
Inkinga obhekana lazo siyazibona kodwa lathi phela nxa ucitsha ugetsi ngaloluhlobo kusuke kusikhathaze. Okunye njalo okusidanisayo yikuba njalonje kuhlala kukhulunywa ngokutshontshwa kwentambo zamagetsi, okusuka kusidide yikuthi amasela azakwekela njani ukutshontsha nxa amagetsi ehlala engekho.
Njengoba lawe Zesa ufuna samukele inkinga obhekane lazo ekusitholiseni ugetsi, lawe ngokufanayo yamukela izikhalazo zethu ukhuphule inani lamagetsi othi lidingwa yimuli ngenyanga eliku-200 liye loba ku-300 ngoba vele imali esesiwathenga ngayo iyasikhama.
Sicela uHulumende laye alukhangele loluhlupho esesibhekane lalo nanku phela singena ezingutsheni siziphumputha lemathunjini kubetha umoya, ngoba lenkuni zokubasa umlilo lazo kazisatholakali ngoba abenkuni bayabotshwa kulezinsuku.
Kanti pho siwasebenzise nini amagetsi esiwathengayo?
Okunye okubuye kusisolise yikuthi kanti amasela lawo atshontshayo azibamba njani intambo ngoba ngendlela esazi ngayo amandla awo kutshengisa ukuthi abatshontsha intambo bangabe belobudlelwano lezisebenzi zeZesa.
Salizwa ihungahunga lokuthi kukhona okufileyo eHwange kodwa sokuqhubeke isikhathi eside.
Kuthiwani bantu ngaloludaba lwamagetsi. Abadala bathi itshukelwa ebandla. Sicela lulungisiswe loludaba ngoba thina izakhamizi sibona angani siyancindezelwa.
Online Reporter