Online Reporter
NgoMvulo lilanga elikhulu njalo eliqakatheke kakhulu elizweni leZimbabwe. Liqakathekile ngoba kulapho esikhumbula khona amaqhawe akhulula ilizwe. Alikhulula nje ngoba lalingaphansi kombuso wabelungu ababesiphethe ngochuku. Besikhahlameza, besihalada, kulendawo lapho abathi kwakungamelanga sihambe khona.
Okwenza ilanga langoMvulo liqakatheke kakhulu yikuthi sikhumbula amaqhawe akhulula ilizwe. Abantwana benhlabathi abangena iganga, befulathela izimuli bedinga inkululeko yelizwe lethu.
Uzibuse yinto enhle kakhulu elizweni. Kuhle ngempela ukuzibusa. Kuyaguqula impilo zabantu zansuku zonke – kwenze lamampofu bahlonitshwe, kunike abasakhulayo amathuba, amhlabathi uyabuyiselwa kulabo abawusebenzelayo, njalo lezizalwane zonke ziyenelisa ukwenza izinqumo ngekusasa lazo.
Kuhle ukuzibusa ngoba abantu sebelezindlu zokuhlala, ezokulima sezithuthukile, ezokuvakatshelana lazo ngokufanayo sezingenisa imali elizweni. Inhlangothi ezehlukeneyo zempilo elizweni zibika intuthuko jikelele elizweni. Intuthuko iyanda, amankampani asemanengi awabansundu. Ngempela kumnandi njalo kuhle ukuzibusa. Yikho esithi nguzibuse ke lowo.
Umnandi mpela uzibuse ngoba uma ilizwe lizibusa emakhaya abantu ababehlupheka bayabe bengasahlupheki.
Elizweni elilozibuse, abantu emakhaya bayakholisa. Amanzi bakha ezibholaneni kumbe emigodini eseduzane labo.
Abahambi umango ongaba yi 20 kilometres besiya kukha amanzi njalo abanathi ndawonye lenkomo ngoba amadamu amakhulu angacitshiyo ayabe egcwele. Elizweni elizibusayo abantu kabathwali nzima uma befuna ukuhamba ngoba imigwaqo iyalungiswa, isindwa ibe mnyama tshu njalo iqine yathi nko ukuthi kungaze kwagebheka ngitsho kungaze kubuye izulu elinganani. Ngempela kumnandi ukuzibusa.
Kumnandi ukuzibusa ngoba elizweni elizibusayo abantu kabalambi. Bayabe belanjiswa yini kambe umhlabathi usezandleni zabansundu? Angithi umhlabathi yiyo insika yabantu? Angithi yiwo umhlabathi owenza abantwana benhlabathi bafulathela onina laboyise bakubhekisa eZambia besiyadinga izikhali zokuzodudula isitha esasesithwalise abantu amagabha avuzayo ekhaya. Kumnandi ke ukuzibusa ngoba uma umhlabathi usuphiwe abantu ngendlela — usebantwini bonke kungakhathalekile ukuthi umbalabani, ukhuluma limi bani, indlala iyaphela elizweni.
NgoMvulo sikhumbula amaqhawe -hatshi alele eHeroes Acre wodwa kodwa lalaba okungaziwayo ukuthi balele ngaphi, labo abangazange badlelwe inkubalo sizibuza ukuthi ilizwe lakithi likhululekile ngempela na?
Siyaziqhenya ngokuthi okuyikho okwafelwa ngabafowethu — ukuthi sithole imfundo, ukwelatshwa, umhlabathi silakho. Intuthuko ivela ngxazonke. Kumele sithi sikhumbula amaqhawe sibone ukuba siyagagadlela lokho abasenzela khona singaze sathengisa ilizwe lethu.
