Online Reporter
Ikhefu leKhisimusi likhangelelwe kakhulu ngabantwana ngoba kulapho abathengelwa khona impahla ezintsha, badle izibiliboco, abanye njalo bavakatshele izihlobo emaphandleni ngoba kudlalwa iKhisimusi.
IKhisimusi lilanga eliqakathekileyo ebantwaneni abanengi ngitsho lasebantwini abadala ngoba phela kuthakazelelwa usuku lokuzalwa kukaJesu.
Ebantwaneni ilanga leli litsho ukudla ezifela emlonyeni kunye lokugqoka impahla ezintsha.
Uthola abadala begijima besiya le lale bedinga imadlana ukwenzela ukuthi ngelanga leli abantwababo bangabi zindlubu eziwele ephokweni.
Okubuhlungu yikuthi umntwana ngeke wakuzwisisa ukuthi kungani owakhe umzali engamthengelanga impahla yokugqoka njengabangane bakhe kumbe iziwiji ngengabomakhelwane.
Kuqakathekile-ke ukuthi abazali babonise abantwababo ukuthi izandla azilingani, bazame ukubakhulisa besazi ukuthi kumele usuthiseke ngalokhu olakho ukwenzela ukuthi ungahawukeli okomunye ngoba isiphetho yikutshontsha.
Yebo umzali ulakho ukuthi engela imali yokuthengela abantwabakhe impahla entsha eyokuba batayile ngayo ngaleli langa kodwa-ke ikhona evele ikhona endlini ehlanzekileyo abantwana abandise ukuyembatha nxa besiyavakatsha.
Umzali kuhle aqale ukuyilungilungisa impahla le ebatshela ukuthi abaseyikuyigqoka kuze kufike iKhisimusi njalo lokuthi uzabathengela ukudla okuthile okufela emlonyeni.
Akunzima ukuhuga umntwana omncane akhohlwe ngitsho lomahluko ophakathi kwakhe labanye abantwana.
Umzali ulakho njalo ukuthatha abantwabakhe abahambise ngitsho endaweni zokuphumelela nanku ngalolosuku kuyabe kulemidlalo etshiyeneyo emnandi kunye lezibane ezikhanyisayo.
Kuqakathekile ukuthi umzali munye ngamunye enze ilanga leli libe mnandi kubantwabakhe ngoba belikhangelele ngamehlo abomvu.
Kuqotho ukuthi intengo yempahla isikhwelile ayisabambeki, kodwa-ke akusikonke okudinga imali, uthando kunye lokwenza imidlalo elingandisanga ukuyidlala njengemuli kulakho ukubakholisisa ngenye indlela.
Kuhle njalo abantu bakhumbule intandane ezingelabazali lezihlobo, kunye labaswelayo abangenza iKhisimusi yabo ibe mandi.
Zinengi izintandane ezigcinwa ezindaweni ezehlukeneyo ezingalutholiyo uthando esilupha abantwabethu.
Akukubi ukuthatha ezinye impahla zabantwabakho ezisakhangeleka uyezinika abanye abantwana enhlanganisweni zentandane ukwenzela ukuthi lakuzo iKhisimusi libe mnandi.
Abantwana abagcinwe enhlanganisweni lezi ezitshiyeneyo bafana xathu labantwabethu abasezindlini, labo ilanga leli liyabaqumbaqumba kodwa bona-ke basuka bazwe ubuhlungu enhliziyweni zabo ngoba bengatholi lokhu abayabe belukhangelele.
Akusimlandu wabo ukuthi abalabazali. Abanye babhujelwa ngabazali kukanti abanye balahlwa ngabazali babo ngezizatho ezitshiyeneyo. Ngakho-ke asibeni ngabazali babo thina.
Bekungaba njani ukuthi umuntu munye ngamunye azinikele ukuthatha okuncane alakho ayekupha omunye umntwana ongelamzali kunye lezihlobo. Kumbe ukuyancedisa labadala abahlala ezindaweni zabasebekhulile. IBhayibhili lithi sibusisiwe esiphayo kulesamukelayo.
Kuncedani kambe ukuthi imuli ipheke ukudla okumnandi idle ize inike lezinja lazo zidle zize zikukhonkothe abanye abantu kundawo ezigcina intandane besidla ingqwenqwe zomlomo?
Ngakho-ke sikhuthaza uzulu emadolobheni ukuthi avakatshele lezindawo ezihlala intandane lasebekhulile ayesiza kuthi abasemaphandleni labo basize intandane ezihlala labogogo abangaselawo amandla okuziphandela.
