Online Reporter
UKUHANJISWA kwemibiko kulezinsuku sekulula kakhulu ngenxa yobulembu lamakhompuyutha labomakhalekhukhwini.
Lokhu sekubangele ukuthi abantu babe lolwazi ngezinto ezitshiyeneyo masinyane njalo lula.
Impucuko yokuhanjiswa kwemibiko masinya iphathisa njalo abafundi abatshiyeneyo ezikolo, emakolitshini kanye lakumaYunivesithi.
Abafundi bayenelisa ukuthola ulwazi ngezifundo zabo ezitshiyeneyo abazenzayo ebulenjini okwenza kubelula ukuchwayisisa ngezifundo zabo. Ngokunjalo abafundi sebesebenzisa amakhompuyutha kanye labomakhalekhukhwini ukudingisisa ngezifundo zabo ukuze baphumelele ezifundweni zabo.
Lanxa kungekho okubi ngokuthi abafundi basebenzise indlela zakulezinsuku ukuthuthukisa imfundo yabo, uhlupho nje yikuthi bacina besebenzisa indlela lezi ngendlela engaqondanga.
Lokhu kugoqela ukuthi abafundi bangasazicabangeli ekwenzeni umsebenzi wabo wesikolo kodwa bamane bafake nje imibuzo yabo kukhompuyutha ibenzele umsebenzi wonke. Abanye njalo ngabathatha lelothuba ukuba babukele imfanekiso engaqondanga ebulenjini okubenza bacine bephatheka kuzimilo ezimbi.
Yikho nje izikolo ezinengi kuleli zingavumeli ukuthi abafundi babe labomakhalekhukhwini esikolo njalo lo obonakala ekwenza lokhu uyajeziswa.
Lokhu kwenzelwa ukuthi kwenqatshelwe ingozi yokuthi abafundi baphazamiseke ezifundweni zabo ngoba sebephatheke ngobulembu.
Isimanga ke yikuthi bakhona abathi akulanto embi ngokuthi abafundi basebenzise amakhompuyutha kanye labomakhalekhukhwini esikolo. Bathi ukuthathela abafundi impahla le kutshengisa ukuthi ababalisi kanye labaphathi bezikolo lokhe besadla ngoludala kungakho kumele bahambelane lesikhathi ngoba imitshina le iqukethe ulwazi olulakho ukuphathisa abafundi ezifundweni zabo.
Kuliqiniso-ke lokhu ngoba ubulembu bulempendulo zemibuzo etshiyeneyo zezifundo ezenziwa ngabafundi esikolo.
Impica isuka ibekhona ngoba abafundi nxa bangavunyelwa ukusebenzisa imitshina le esikolo balakho ukucina beyisebenzisa langezikhathi umbalisi ephakathi kokuqhuba isifundo.
Phela impahla efana labomakhalekhukhwini umfundi ulakho ukuzisebenzisela nje ekilasini esenza okungelani lezifundo umbalisi eqhuba isifundo engananzeleli njengoba ezikolo ezinengi amakilasi aba labafundi abedlula i-40. Lokhu lakho kulakho ukuthi kucine kubangela ukwehluleka kwabantwana ezifundweni zabo nxa sebebhala imihloliso.
Kungumbono waleliphephandaba ukuthi indaba yokuvunyelwa kwabomakhalekhukhwini idinga ukuthi ichwayisiswe okuzwayo ngoba lokhu kungabisela emuva ezemfundo zakuleli kukanti beziqakathekiswa kakhulu.
Yebo ye kungaze kuthiwe kuzakuba lezikhathi lapho abafundi abazavunyelwa khona ukusebenzisa omakhalekhukhwini njengangesikhathi setiye kumbe esokudla kwemini kodwa kasiqapheleni phela ukuthi abantwana balabo ubuhlongandlebe kungakho kungenzeka ukuthi bacine sebewasebenzisa langesikhathi angavunyelwa khona.
