Online Reporter
KUQAKATHEKILE kakhulu ukuthi abantwana bathole usekelo oluvela ebazalini babo. Lokhu kubenza ukuthi baphumelele njalo basebenze nzima ngoba besazi ukuthi balaso isibusiso somzali.
Zivuliwe izikolo okutsho ukuthi abantwana sebeqalile izifundo zabo zomnyaka ka-2026. Ezikolo abantwana bayatshengisa ukuba baleziphiwo ezitshiyeneyo futhi ezimangalisayo.
Yebo isikolo siqakathekile ngoba lezi insuku kunzima, akuphileki nxa umuntu engafundanga. Lokhu sokwenza ukuthi abadala bethi umntwana akulanda esikolo yikufunda amabala kuphela, uzwe beyalisa umntwana ukuhamba emidlalweni yesikolo etshiyeneyo ngoba esithi kuzamphambanisa ezifundweni zakhe.
Abantu badalwa ngendlela ezehlukeneyo, ayisuye wonke umuntu otshayayo isikolo ngoba omunye kuyabe kungayisiso sakhe isikolo, siyabe singekho egazini lakhe kodwa esenelisa ukugijma, ukweqa kumbe ukutshaya ibhola lenyawo kumbe elezandla.
Uzwa abantu abansundu behlala bekhala bethi abeLungu badalwa babangcono kulathi ngayo yonke indlela ngoba bayaphumelela ndawo zonke. Lawa ngamanga aluhlaza, sonke siyafanana kodwa umehluko wabo yikuthi bayananzelela ukuthi abantwababo balasiphi isiphiwo besesebancinyane bahle babasekele bakhule besenza kuhle kakhulu lapho abenelisa khona uzwe kuthiwa umntwana wakhona seyintshatshu yokujika ibhola lensimbi edlula umhlaba wonke.
Lokhu kusukela ebazalini bakhe lomuntu obone ukuthi umntanakhe amabhuku awavuki ngakho-ke kungcono amsekele ngakho konke umntwana akudingayo ukuze aphumelele kulokho akuthandayo.
Okunye okumangalisayo ngabazali laba abathi bona umntwana uya esikolo ukuyafunda kuphela uthola engathengeli umntwana ingwalo ezeneleyo kodwa emtshova esikolo.
Esikhathini esinengi abantwana abafuqelwa esikolo bengaphiwa ingwalo ezeneleyo yibo abatshaya kakhulu isikolo uthole bedlula bonke abantwana ngesikolo baze baphiwe izicoco zokubakhuthaza ukuthi baqhubekele phambili.
Umntwana uyabe efuna ukuthi umzali abuye azomsekela ngelanga lokuphiwa kwakhe isicoco kodwa uthola umzali engazihluphi athi yena uyabe esenza eminye imisebenzi. Kambe sibili mzali ufuna umntanakho aphumelele njani kumbe azimisele njani nxa wena ungamsekeli njalo ungamtshengisi ukuthi ulothando lalokho akwenzayo.
Lalaba abenza okwemidlalo asibathengeleni impahla eziqondileyo emdlalweni yabo njalo siphinde siyebabukela emincintswaneni yabo. Lokhu kwenza ukuthi umntwana asebenze nzima aze aphumelele.
Okunye asisekeleni abantwana badala emisebenzini yabo abayikhethayo. Abanye ngabenza imisebenzi yezandla. Kwesinye isikhathi uyathola umntwana ethanda ukubaza izithombe ezithengisa athi etshela abazali ukuthi yikho afuna ukuphila ngakho uzwe umzali esithi “ubona angathi kuza kusa ngaphi khonokho?”
Mzali sekela umntanakho ngoba awukwazi ukuthi ufuqwa kuyini ukuze akhethe lokho akukhethileyo. Vele abantu abafanani ngoba wena ungutitshala ungacabangi ukuthi umntanakho laye uzaba ngutitshala laye. Umuntu lomuntu ulendlela yakhe ayikhethileyo.
