admin
UTHANDO lungumanqoba ngoba lapho okulothando khona ubona abantu bebobotheka yonke into imnandi ngakho ke kuhle ukuthi uthande umuntu wakho zikhathi zonke.
Abantu bakudala babelwazi uthando njalo imizi yabo yayihlala iqinile. Umuntu wayekhetha ukuthi ahlale lomuntu ongelanotho ongela ngitsho lenkomo ngoba uyabe emnika uthando olujulileyo njalo oluvutha bhe!
Lamuhla akusekho konke lokhu abantu sebegijimisa imali kuphela lobunandi bedolobho bekhohlwa ukuthi kumele banike omkabo uthando oluyintokozo lenjabulo enkulu.
Yebo impilo esiyiphila lezi insuku ngeyemali kodwa ke ungakhohlwa ukuthi uthando ngeke uluthenge lapho ofisa ukuthandwa khona thanda lawe ngendlela efanayo. Uthola indoda ingena emsebenzini ekuseni itshayise ebusuku.
Ekutshayiseni adlule ebhawa angene ebusuku umama selele wavuka futhi ekuseni ayemsebenzini aze ngobusuku futhi.
Umdeni ucina ungasakwazi ukuthi kulobaba ekhaya. Yikho-ke lapho okucina kungena igenga eselibizwa ngokuthi ngu-Ben 10 elizazenza indoda emzini wakho.
Isenzo lesi sibi kakhulu tshintsha ukwenza mfowethu ngoba phela umama uyasidinga laye isikhathi sokubalawe.
Abantu besifazane banjengabantwana umfazi uyabe efuna isikhathi sokuba lomkakhe. Owesifazane ungamupha leso isikhathi uyabe umjabulise kakhulu uzambona ekhuluphala esiba yindlovukazi okutshengisa ukuthi uphethwe kuhle.
Njengoba nje siphakathi kwekhefu akhona amadoda asafulathela imizi yabo ayahlala labomakhwapheni akhohlwa ngomkabo.
Labo abenza lokhu bakhumbula emuva nxa izikhwama sezibetha umoya kodwa okwakhathesi bazitshaya izifuba bengazi ukuthi kayisikho kutshengisa omunye wakho uthando lokhu.
Nxa umuntu wakho umthanda uzambona laye ekuthanda.
Laloba utshone emsebenzini bona ukuthi uyamfonela umbuze ukuthi utshone njani mtshele njalo ukuthi uyamthanda.
Uthando vele lona lungumanqoba njalo kakho ngitsho loyedwa owala ukuthandwa ngoba lokhu kukundalo yethu njengabantu.
Kuyadingeka ukuthi ezimulini abantu bathandane ngazo zonke izikhathi ukuze imizi ingachitheki njengalokhu esesikubona kunsuku zalamuhla lapho imizi esichitheka ebusuku lemini kungabi ndaba zamuntu ngitsho.
Kungumbono waleliphephandaba ukuba aluba wonke umuntu engazipha umlandu wokuthanda lo amkhethayo njalo angaze akhohliwa ngamaluba omhlaba ngoba aphanga edlule njengobukhosi obufana lamazolo.
Online Reporter