Online Reporter
UKUGUQUKA komumo womkhathi sokulethe indingeko yokuba abalimi bathathe umshuwalensi wezilimo zabo ukuze bavikele ukulahlekelwa okungenzeka kubavelele nxa kungaba lengozi zomkhathi ezicina ziphazamisa izilimo zabo.
Kwenzakala ngesikhatshanyana nje ukuthi ikhaba ebelibukwa emasimini litshabalale ngenxa yesiqhotho kumbe omunye umumo womkhathi ongaqondanga.
Kungana izulu lesiqhotho abalimi abanengi, iphupho lokuba lesivuno esikhulu lisuke litshabalale basale bephakathi kwezikwelede ezimangalisayo ngenxa yokulahlekelwa.
Ukulima kuhlezi kufaniswa lokubheja amabhiza ngesizatho sokuba umlimi angaba lenhlanhla athole isivuno esihle kumbe njalo umkhathi ungaphenduka alahlekelwe yikho konke abekukhangelele.
Abalimi balima belethemba elikhulu kodwa isivuno sibakhona nxa umkhathi uvumile.
Izulu lingaphangisa ukuqala ukuna libuye litshiye izilimo zingakavuthwa kumbe njalo lingaphuza ukuna izilimo zicine zibulawa yisomiso nxa kungenzeka siqhubeke isikhathi eside. Kuyenzeka njalo kweminye iminyaka ukuthi izilimo zihlaselwe yibudli umlimi alahlekelwe.
Phakathi kwakho konke lokhu isimanga yikuba abalimi baqhubeka belima emasimini abo bengavikeli izilimo zabo.
Inhlekelele ezifana lalezi zingenzeka kubalula nxa uthethe umshuwalensi ukuba ubhadalwe ungaze walahlekelwa nxa sekuthe kwaba lengozi zomkhathi.
Kuyadanisa ukuthi abalimi abanengi abancane abayibo umgogodla wezokulima kuleli baqhubeka besebenza gadalala emasimini abo bengazivikelanga kodwa bebona umthelela wokuguquka komumo womkhathi.
Izilimo zabo ezilindela ukuthelezelwa ngezulu kwezinye izikhathi zicina zitshabalaliswa ngumkhathi kukanti ziyabe zingavikelwanga okwenza balahlekelwe yinzuzo yabo.
Umshuwalensi wezilimo uyadingeka kulezinsuku zokuguquka komumo womkhathi. Uyancedisa umlimi kungenzeka ukuthi alahlekelwe yizilimo zakhe ukuthi enelise ukuvuka azithintinte aqale kutsha ngoba kwabanye kucina kusiba nzima ukubuye balime futhi nxa bengelawo umshuwalensi.
Nxa umlimi engafuni ukuthatha umshuwalensi, kufana nje xathu lomuntu odlala amakhasi ngempilo yemuli yakhe, kunye lekusasa layo.
Ngomshuwalensi, umlimi uthola isivikelo — isiqinisekiso sokuthi noma inhlekelele ingafika, angalima kutsha futhi aqhubeke ngokuncedisa ekuthuthukiseni umnotho welizwe.
Kuyadingeka ukuba abamankampani omshuwalensi kunye loHulumende basebenzisane ukusungula imshuwalensi efinyeleleka kubalimi abasakhula hatshi ukuba kube lemshuwalensi ebizayo yabalimi abalima endaweni ezinkulu kuphela.
Umshuwalensi ungakhuthaza ukukhula kwabalimi ngoba besazi ukuba bavikelekile. Balakho njalo ukulima imihlobo yezilimo ezilohlonzi kunye lokulandela indlela zakulezinsuku zokulima bengesabi ngoba besazi ukuthi ngeke balahlekelwe zimali zabo.
Kukanti ukuswela umshuwalensi kwenza abalimi babe lokwesaba njalo bathandabuze ukulima indawo ezinkulu kunye lokulima izilimo ezilohlonzi ngoba besesaba ukulahlekelwa nxa kungenzeka kube lesiqhotho esikhulu.
Nxa singehluleka ukuthatha inyathelo khathesi, abalimi abanengi balakho ukulahlekelwa ngamaphupho abo okuncedisa ekukhuliseni umkhonomi wakuleli ngezokulima ngoba besesaba ukulahlekelwa yinzuzo yabo ngenxa yenhlekelele zomkhathi.
Nxa singakhetha ukubhadalela izilimo zethu umshuwalensi khathesi kungasincedisa ekukhuliseni umkhonomi wethu ngaleso sizatho umlandu ngowethu ukuba sikhethe ukubhadalela izilimo zethu umshuwalensi lamhlanje.
