adminKUQAKATHEKILE ukuba nxa ungumkhokheli, wazi ukuba awukhokheli izigodo kumbe inyamazana ezizakukhangela nje ngamehlo zingakhulumi lawe kumbe ngawe. Kuqakathekile njalo ukuba umuntu akwazi ukuba kukhangelelwe ukuba abe yisibonelo kubantu abakhokhelayo, anqande isigaba kumbe indawo yakhe ekubeni singenzi okungaqondanga ngesiko lesiNtu kunye langomthetho.
Okwenziwa ngabalisa kanye labosobhuku bakulezinsuku akusizenzo ezingakhangelelwa emuntwini ongumkhokheli ngoba mzekeliso bani abawupha abantu ababakhokhelayo? Zinengi indaba esizibala emaphephandabeni mihla lemihla ngabalisa besephula imithetho kunye lokuzehlisa isithunzi emphakathini ngokwenza izinto ezingafanelanga.
Kukhona abanye abakhokheli abatshaya abantu bababhaxabule basale belimele kakhulu kuthi ezinye inkokheli zephula umthetho ngendlela ezitshiyeneyo. Kambe kuyini oyabe ukwenza phambi kwabantu abazakufunda kulesi senzo?
Kambe ngubani ongahlonipha umkhokheli okuthiwa uledlalicatsha kumbe utshona enatha ebhawa athi angadakwa aqale ukulwa labantu kulokuba abe ethungatha amasu okuthuthukisa isigaba sakhe?
Utshwala budala, babunatha babutshiya okhokho bethu njalo buvele kabulunganga ngoba benza abantu bengathathisisi kahle ezinye izinqumo abasuka bazenze, yikho libona nje bungavunyelwa ukunathwa umuntu etshayela. Pho-ke umkhokheli ovuka ngabo aze ayelala ngabo, mqondo bani ongadakwanga, ohluzekileyo angaphuma lapho?
Asithethisi muntu njengoMthunywa kodwa sithanda ukukhuza, ukuxwayisa lokubonisa ububi ngokubenza bube mgceke loba nje omunye ubengathi kulicala na ukuziphuzela intombi kaMaGwebu.
Kuliviki iphephandaba leli limumethe indaba ehlasimulisa umzimba yomunye umlisa okubikwa waqonda enye imuli yakoSigola eyacatshelwa ngumntwana wayibikela ukuba umntanabo bazamthola esengamathambo andubana elinye ilunga lakomlisa liveze ukuba yilo elathunywa ukuthatha umntwana. Kambe indaba engaka nxa isenziwa ngumkhokheli wesigaba ibizwa ithiweni? Khona abantu bamhloniphe bathini umkhokheli ozichazayo ukuthi ulesandla kumithanithani yobukhunkuli?
Yibo laba abakhokheli abathi nxa kulemihlangano eqakathekileyo, abanye babo babike ngokukhathaza izigaba zabo, zona zibe zizitshayela isithongwane cala celeni.
Yizo lezi izigaba ezisalela emuva, uthola umuntu othe wethekelela khona ethi kaphindi futhi alugxobe ngoba sekungani yimfanelo ukuba kube lamagodi emigwaqweni eyakhona.
Indlala kulezondawo iyazithaphuzela, kukanti abantu bakhona basaphila impilo enzima ngoba kungela zikolo, amagetsi lamanzi. Amacala kuleyondawo andise ukwanda ngoba abantu esigabeni kabavumi ukuthoniswa ngabakhokheli abalezici abazaziyo. Kanti vele uyabe engakhuza bani agwebe bani laye eyisigilamkhuba?
Bezikhona impunga ekadeni ebezeluleka abakhokheli zibabonise indlela lapho sebelahleka, pho khathesi-ke kuzathiwani?
Sitshayela ihlombe induna yakule indawo ethe isizwa ngendaba le yahle yamisa umlisa lo umsebenzi.
Online Reporter