admin
KULEZI insuku sekunzima ukuba umuntu athembe umphurofethi ngoba sebephenduke impisi eziphangayo. Nxa umuntu esesontweni uyabe elenkinga ezinengi ezimhluphayo ngakho uyabe ekholwa ukuba engathandazelwa ngumphurofethi lezo nhlupho zizaba nganeno.
Osekusenzakala kulezi insuku kutshengisa sobala ukuba umhlaba uyaphenduka ngempela ngoba abantu okumele ngabe yibo abadonsela abantu enkosini sebephenduke izinyamazana.
Ngeviki edluleyo inengi lamaphephandaba beliqukethe udaba lomunye umphurofethi weGoli obedlisa abazalwane inyoka. Inyoka lezi ebeziphila, ubezipha abazalwane ukuthi badle ukuze abone ukuthi balokholo oluphakemeyo na? Umphurofethi lo ubesithi inyoka lezi abazalwane badle ngoba kuyi-chocolate.
Umbuzo okhona yikuthi kwake kwenzakala ngaphi ukuthi inyoka zidliwe ziphila. Kambe basebenzisa imimoya bani ukwenza izimanga ezinje. Lokhu kutshengisa sobala ukuthi umhlaba ususemaphethelweni. Ngomnyaka ophelileyo kulomunye njalo umphurofethi oke waduma obedlisa abazalwane utshani.
Ungakhangelisisa endulo abaphurofethi babeboniswa ngezinto ezazizakwenzakala elizweni kodwa lamhlanje abaphurofethi abakhona ngabaxeganisa abantu. Uthola umphurofethi etshela elinye ilunga lemuli ukuthi liloywa ngelinye. Kungani abaphurofethi laba sebehlukene labendulo.
Kungumbono woMthunywa ukuba abantu bengadukiswa ngabaphurofethi laba abazifunela udumo kuphela.
Abantu nxa besenkonzweni kumele bahlole umphurofethi wabo indlela atshumayela ngayo.
Ibhayibhili yisikhali esikhulu njalo liyaveza ukuthi umphurofethi wamanga loweqiniso ubonakala ngani.
Kungumlandu wabantu ukuthi babone ukuba abaphurofethi kunye labafundisi abaphambi kwabo kabasi mpisi ezembethe isikhumba semvu.
Umphurofethi oqotho ubonakala njalo langezithelo azithelayo okutsho ukuthi impilo yakhe yansuku zonke iyamchaza ukuba usebenzela uNkulunkulu kumbe omubi.
Sekukanengi sisizwa njalo ngabatshumayeli abaxotsha abazalwane abanganikeliyo enkonzweni ngoba besithi baletha ubuyanga ebandleni.
Abaphurofethi abanje batshengisa ukuthi bayizithunywa zikaSathane ngoba indlela abasebenza ngayo ingalunganga.
Uzulu kudingeka ukuthi alimuke abaphurofethi laba ukuze angaweli engozini njalo yiyo kuphela indlela engasiphathisa ukuqeda ubugangi lobu.
Online Reporter