admin
YiNtatheli kaMthunywa
Kuphume icimbi ngobunengi balo esigabeni seFilabusi kuliviki osekudale ukwanda kwabantu abavela kwezinye izabelo.
Kubikwa kuyenyanyeka, abantu bayahlikihlana kubangwa ukugola amacimbi la. Ukwanda kwabantu sekwephule lomthetho okhona owekwenqabela ukumemetheka kwegcikwane leCoronavirus.
UMthunywa uzwe ukuba uzhizhi lwabantu lukuWadi 3, 6 lo9 lapho okulomgodi okuthiwa yiBhinyaphi.
Lezo ndawo yikho okulamacimbi amanengi.
Umthetho weWorld Health Organisation, olandelwe nguhulumende uthi abantu bengayindawo, behlale ezindlini okwamalanga angu-21.
Kodwa ngokuvumbuluka kwamacimbi la eFilabusi, abantu bakutshaye indiva okweCorona.
Usihlalo wenhlanganiso yeGodlwayo Community Development uMnumzana Nkululeko Tshuma uthe bathithibele ngenani labantu elithe gwaqa kibo belande ukuzogola amacimbi.
UMnu Tshuma uthe isimanga yikuthi abantu laba bavela khatshana kuzabelo zeMashonaland, eMasvingo laseChinhoyi.
Ukufika kwabantu laba besedlula amapholisa lamasotsha emgwaqweni emikhulu kusidida ingqondo eFilabusi ngokutsho kukaMnu Tshuma.
“Kunzima. Laba abantu bavela khatshana sibili belande amacimbi. Sesabela ukuthi kuzaqhamuka lomkhuhlane lo oweCovid-19 nanko phela banengi abantu, njalo bagola amacimbi ngendlela engahlanzekanga.
“Ngokuthola kwethu, abantu laba basuka eMasvingo abanye bavela kuboChinhoyi,” kutsho uMnu Tshuma.
Ucele uhulumende ukuthi angene kulindaba elakho ukuletha inkinga ekulwisaneni leCovid-19.
Kulandela ukugcizelwa lokuthi abantu baziphathe, behlale emakhaya, kutholakele kumaviki amabili adluleyo ukuthi indlala yiyo ekhipha abantu ezindlini.
Ukugcwala kwabagoli bamacimbi eFilabusi kungumzekeliso wokuthi abantu abayesabi iCovid -19.
Online Reporter