Online Reporter
Nkosilathi Sibanda
UMDLALI weBinga Soccer Academy uGracious Mumpande usethole ithuba lokuthi akhulise ithalenta lakhe enkundleni lokuthola izifundo zezinga laphenzulu kulandela ukuthola indawo eTexas College eMelika.
Umqondisi weBinga Soccer Academy uPride Ngwenya ubikele iZimpapers Sports Hub ukuthi umdlali wabo uthole i-scholarship sokuthi ayedlala inguqu lokuqhuba izifundo. Uzakuba ngumdlali wokuqala odabuka eBinga, eMatabeleland North ukuthola ithuba elinje.
I-scholarship lesi sivele kunhlanganiso yeVision2Africa.
“Sicela lisincedise sijabulele umdlali wethu, owakithi eBinga uGracious Mumpande. Ngumfana owazalelwa eBinga, wakhulela lapho. UGracious usezimisele ngokusemthethweni eTexas College ngemva kokuthola i-scholarship sebhola, waba ngumdlali wokuqala owazalwa eBinga ukudlala ibhola eMelika,” kutsho uNgwenya.
Okwakhathesi uMumpande ubedlalela iZebra Revolution, kukhangelelwe ukuthi ayeMelika ngoNcwabakazi.
Inhlanganiso yeVision2Africa ithe:
“KuVision2Africa, sihlonipha ukuthi sibelesandla ekwakheni ithuba elinje eliyisiqalo kuzigaba ezisemaphandleni akhatshana eZimbabwe. Inhloso yethu yikuvumbukula ithalenta kuwo wonke amagumbi e-Africa, lezinye indawo.”
