Online Reporter
Nkosilathi Sibanda
UMDLALI weFC Platinum uBrian Banda usedlule emhlabeni.
UBanda ufe kulandela ukuba sengozini yomgwaqo osuka eMasvingo usiya koBulawayo.
Inhlanganiso yePremier Soccer League (PSL) ikhuphe umbiko, iduduza imuli yakoBanda ngesehlakalo lesi.
“IPremier Soccer League idabuke kakhulu ukuzwa ngokudlula emhlabeni kukaBrian Banda ongumdlali weFC Platinum. Ubengumdlali obelethalenta, uthando lokuzinikela emdlalweni.
“UBrian utshiye umthelela omuhle enkundleni yomdlalo, enhliziyweni zabalandeli, iqembu lakhe kunye lomphakathi webhola. Sidlulisa amazwi enduduzo emulini yakhe, abangane, imuli yeFC Platinum labo bonke emdlalweni webhola ngalesi isikhathi esinzima.”
Umuyi wake wadlalela iHighlanders iqembu elamnikeza udumo. IHighlanders ithe:
“IHighlanders Football Club idane kakhulu ngokudlula emhlabeni kukaBrian Banda, umdlali wasesiswini weFC Platinum njalo owake waba ngumdlali weHighlanders.
UBrian ubengumdlali wasesiswini olesiphiwo njalo ezigqaja ngokugqoka ijesi lethu elimnyama lokumhlophe, ngaphambi kokuba aye kuFC Platinum. Sidlulisa amazwi enduduzo kumuli yakhe, abangane, abadlali, ngalesi sikhathi sokulahlekelwa okukhulu. Sengathi umphefumulo wakhe ungalala ngokuthula.”
