Online Reporter
YiNtatheli kaMthunywa
KULOVALO olugubuzele izakhamizi zemalokitshini eNtumbane leMakhandeni ngemva kokuba umfana oleminyaka engu-15 ethole isidumbu sowesilisa sifihlwe phezu kwamaphayiphi e-sewage egangeni elehlukanisa amalokitshi akoBulawayo la.
Amapholisa aseqalise uphenyo ngecala lokubulala ngemva kokutholakala kwesidumbu lesi, ukuze kwazakale ukuthi ngubani, kodwa umufi kucatshangelwa ukuthi engaba leminyaka yokuzalwa engaba ngamatshumi amane.
Isidumbu sitholakale ngoLwesithathu ekuseni ngeviki edluleyo ngumfana lo obesendleleni yokuya eNtumbane Complex.
Kubikwa ukuthi umfana lo wabona isidumbu siphezu kwephayiphi e-sewage endaweni egcwele izihlahla, wasebikela amapholisa masinyane.
Isikhulumi samapholisa eBulawayo, u-Inspector Nomalanga Msebele, uthe izigqoko zikamufi bezigcwele igazi njalo elamanxeba amathathu okugwazwa.
“Amapholisa koBulawayo aphenya icala lokubulala elenzakale eNtumbane lapho okutholakale khona isidumbu sowesilisa ongaziwayo elamanxeba okugwazwa,” kutsho u-Insp Msebele.
Uthe mhlaka 10 Nhlangula 2026, ngehola lesitshiya galolunye ekuseni, umfana oleminyaka engu-15 yokuzalwa owayesiya eNtumbane Complex wabona isidumbu somuntu phezulu kwephayiphi ye-sewage egangeni eliphakathi kweMakhandeni leNtumbane.
Ngesikhathi kutholakala isidumbu, umufi ubegqoke iT-shirt ebomvu, ijazi elimnyama, ibhulugwe elimhlophe, ibhanti elimnyama lamatheki amnyama lamhlophe ohlobo lwe-Adidas.
Kubikwa njalo ukuthi ubephethe umxhaka wamakhiye alesiphatho esibhalwe ukuthi “T. Ncube.”
Amapholisa asola ukuthi umufi kungenzeka wahlaselwa kwenye indawo ngaphambi kokuba isidumbu sakhe siyelahlwa kuleyondawo.
Ngemva kokubikwa kwalesisehlakalo, amapholisa afika endaweni yesehlakalo, isidumbu sahanjiswa e-United Bulawayo Hospitals ukuze siyehlolwa ngodokotela.
U-Insp Msebele unxuse uzulu ukuthi asebenzisane lamapholisa ekutholeni abenze lesisenzo esibi.
“Sicela loba ngubani ololwazi olunganceda ekubotshweni kwabasolwa ukuthi abikele amapholisa aseduzane.”
Uphinde wacela imuli ezilesihlobo esanyamalalayo esingahambelana lengcazelo yomufi ukuthi ziye e-United Bulawayo Hospitals.
Ukutholakala kwalesisidumbu sekutshiye izakhamizi zeNtumbane leMakhandeni zisevalweni ngenxa yokwanda kwezehlakalo zodlakela.
Abanye sebecele ukuthi amapholisa engeze ukuhamba ezitaladeni.
