admin
Ethel Ncube
KULEMULI yeGwayi line eNyamandlovu ehlelwe liyezi elimnyama ngemva kokuba elinye ilunga lemuli yalo ligwazwe esiswini ledlula emhlabeni.
Indaba le yenzakale ngeviki ephelileyo lapho umuyi uTheophelus Ngwenya oleminyaka engu-18 agwazwe ngumfana oleminyaka engu-16 wedlula emhlabeni.
Kuvele ukuba umetheswacala esingeke sachaza igama lakhe, wahamba ekweluseni ethwele ingqamu yesitshebo wasehlangana loNgwenya baqala ukulwa kodwa kwathutsha omunye owayesedlula wabalamula wasesedlula engazi ukuthi umetheswacala lo ujonge ukuchitha umphefumulo.
Umetheswacala ebona ukuthi owayebalamula usedlule, wakhipha ingqamu yakhe wagwaza uNgwenya esiswini.
Kubikwa loba uNgwenya wathwalelwa esibhedlela kodwa wabhubha engakafiki esibhedlela.
UMthunywa uxhumane lesikhulumi samapholisa eMatabeleland North uInspector Glory Banda oveze ukuba udaba olunjalo uselwamukele.
“Samukele umbiko womfana oleminyaka engu-16 ogwaze oleminyaka engu-18 wafa belusile egangeni.
“Sithanda ukugcizelela ukuthi impilo iqakathekile njalo kumele ihlonitshwe. Ukulwa ayisiyondlela yokuqeda uhlupho. Abantu akumelanga bahambe bethwele izikhali ngoba bacina belingeka ukuzisebenzisa okuyikho okudala amacala,” kuphetha ulnsp Banda.
Online Reporter