admin
Khanyile Ndebele
KULOWESIFAZANA oleminyaka engu-31 okubikwa wadlwengulwa waphinda wathathelwa imali lempahla ayelazo kulandela ukugada imota engekho emthethweni esiya eGwanda.
Kuvele ukuba inina leli elalihamba labantwabalo abathathu lathi seliphakathi kwemota yaqonda egangeni leRichmond lapho okwenzakala imbedumehlwana le.
Kubikwa ukuthi mhlaka 7 Nhlolanja owesifazana lo, wayedinga imota eziya eGwanda. Kuzwakale ukuthi amadoda amabili ayehamba ngemota ebizwa ngokuthi yiFun Cargo elombala oyi-silver amthwala esithi aya eGwanda.
UMthunywa uzwe ukuba bathi sebeseMilton High School baphambuka emgwaqweni wokuya eGwanda baqonda emgwaqweni weHarare lapha owesifazane abuza khona ukuthi sebesiya ngaphi bathi kukhona abafuna ukudlula bemthatha laye oya eGwanda.
Kubikwa bathi sebengena eNorth End umamangala waqala ukuhlaba umkhosi edinga uncedo omunye wamadoda la owayehlezi emuva wakhupha ingqamu wamethusela.
Kubikwa baphinda baqonda entshonalanga eRichmond egangeni lapha umtshayeli walimota afika wathi aphume emoteni wamdonsela egangeni andubana amhlubule impahla wathatha iUS$120 waphinda wambamba iganyavu.
Kubikwa ngemva kwalokhu wabiza omunye wakhe ukuthi laye azomdlwengula kodwa wala wasebuyela laye emoteni lapha afika wamthathela umakhalekhukhwini we-Itel A36, Itel P36 pro leMobicel kanye lama-weave amahlanu bamtshiya egangeni labantwabakhe.
Isikhulumi samapholisa akoBulawayo uInspector Abednico Ncube uthe bamukele umbiko wenina eligade imota andubana likhuthuzwe imali liphinde lidlwengulwe.
“Sikhuthaza umphakathi ukuthi ulalele imikhankaso ehlala isenziwa ngamapholisa ebalimukisa ngengozi zokugada izimota ezithwala abantu ngokungekho emthwethweni ngoba yizo ezisetshenziswa yizigebenga ukwenza amacala afana lala,” kuphetha uInsp Ncube.
Online Reporter