admin
lntatheli kaMthunywa
ZILOKHU zibabaza izakhamizi ezihlala duzane lepulazi leDwaleni Dokotela eFort Rixon ngemva kokutholakala komntwana oleminyaka eyisificamunwe munye obengabonakali efile emfuleni ngeviki ephelileyo.
UVusumunzi Sikhosana oleminyaka engu-9 kubikwa wacatsha wadingwa andubana isidumbu sitholakale emfuleni.
Uyise kamuyi, uJethro Sikhosana sekudlule usuku engamboni umntanakhe watshela omakhelwane baphuma ijumo bebanengi bayadinga umntwana.
Ekhuluma lentatheli kaMthunywa uMnumzana Bongani Ndlovu uthe sebezwe ukuthi umntwana kabonakali basabalala iganga lonke bemdinga.
“Sathi sisizwa umbiko wakoSikhosana kasizange sibe sisaphozisa amaseko saphuthuma sayadinga umntwana.
Sasuka ngakibo sahamba silandela unyawo saze sayafika emfuleni. Umango esiwuhambileyo ungaba yi-5km.
“Omunye uthe ethi mehlo suka wahle wambona emanzini. Lokhu kwaba lusizi olukhulu kakhulu ngoba besidinga singakhangelelanga usizi. Besilethemba lokumthola ephila sisithi yikulahleka nje,” kuchasisa uMnu Ndlovu.
Isikhulumi samapholisa ulnspector Loveness Mangena ebuzwa ngodaba lolu uthe solufikile ewofisini labo njalo uzulu ngaso sonke isikhathi kananzelele ebantwana.
“Uzulu ngaso sonke isikhathi kananzelele abantwana njalo lapho abayabe bekhona kumele benelise ukubabona ukuze kungabi lokulahleka kwempilo okufana lalokhu.
“Okunye njalo izikolo zivulwa nxa izulu lilokhu lisina abazali sibakhuthaza ukuthi baphelekezele abantwana esikolo lokuyabathatha ikakhulu labo abachapha izifula,” kuphetha uInsp Mangena.
Online Reporter