Umfana omncane ngubani?

YiNtatheli kaMthunywa
KULIMPELAVIKI kungenzeka ukuthi kudliwe amathimu amabili ayesatshwayo kunguqu yakuleli iHighlanders leDynamos.

Inkundla zakoBulawayo ziphethe imidlalo emibili — iHighlanders ihlasela umakhelwane iChicken Inn eBarbourfields kuthi iHow Mine idibana leDynamos.

IChicken Inn leHow Mine zingaqeda impelaviki zitshiye imbali yokuwisa inkunzi zenguqu zombili, okuyikhona okwenza imidlalo le ibaluleke ukwedlula yonke.

Kulesigaba seligi, amaGamecocks ayakhokhela ingalane ngemiklomelo engu-20. IBosso iyancengisa kunombolo yesithathu nge-14.

Kulumdlalo wangoMgqibelo, iChicken Inn ikhangelelwe ukuthi inqobe ngoba idlala inguqu engakaze ibonakale kuqula labadlali beHighlanders.

Lokhe yangena kuPSL, iHighlanders ayikaze inqobe iChicken Inn. Kuzafiwa emagumeni eBarbourfields njengoba layo iBosso izazama ukuvala ukunqotshwa kwayo lula kulinkundla.

IDynamos layo isevalweni ngokuhlangana leHow Mine. Amathimu la atshiyene ngemiklomelo emibili njalo ayalandelana kulogu.

Umqeqetshi weHow Mine uLuke Masomere ubika ukuba iDynamos ayisoze isuke koBulawayo ijabulile.
Izimbamgodi zemukela ithimu yaseHarare ngeSonto enkundleni yeBarbourfields kumdlalo wetshumi weligi yeCastle PSL.

UMasomere ubika ngokungesabi ukuthi iDynamos kayiphumputhi. Ekhuluma loMthunywa ngoLwesithathu, umqeqetshi lo, osebhode amathimu amanengi uthe umdlalo kuzwa kulimpelaviki ngowabo.

“IDynamos ayikhohlwe ngokunqoba iHow Mine. Sisekhaya thina ngakho ngeke sidelelwe. Phakathi kwemidlalo yonke ngibona angathi lo yiwo ozahlabusa.”

“Njengamathimu amakhulu la awakhohlwe ukuthi azadlula eqinjini lami. Inhloso yethu njengokutsho kwami ngiqala ukuqhatshwa yiHow Mine yikuthi sidlalela ukungakhitshwa kuligi. Okuqakathekileyo yikunganqotshwa nxa sidlala koBulawayo,” kutsho uMasomere.

Uqhubeke wathi: “Ayisikho ukuthi siyethusela kodwa sithi akulanto esiyesabayo. Ithimu yonke ekuligi le izimisele, nxa singanqotshwa kutsho ukuba asisebenzanga kuhle.”