admin
Joel Ndlovu
Zisele zibambe owangaphansi izakhamizi zelokitshini lenketa 8 emva kokuba umfazi kamphrophethi ebanjwe esamathandweni lomakhelwane ngeviki edlulileyo, umthunywa ukuzwile lokhu.
Kubikwa uSamantha Chigaweni ongumfazi kamphrofethi u Luckson Chigaweni ubanjwe ethandana lomakhelwane wakhe u Lovemore Zikhali.
Ekhuluma lentatheli kamthunywa omunye wabomama obesondelane labo othande ukwaziwa ngo Sinanzeni ojayele ukuthengisela imibhida lamatamatisi phambi komuzi wabo uthe kwakulehungahunga elokuthi umakhelwane ufuna umfazi kamphrofethi kodwa akula owayekufake ekhanda ukuthi ingaba liqiniso.
“Umphrofethi njengenjwayelo wayephumile esiyakhuleka labazalwane bakhe ilanga lelo waphangisa ukuphenduka emini ngehola lesibili wathola umkakhe engekho endlini kulabantwana kuphela.
“Wababuza abantwana ukuthi umama wabo wayengaphi bathi selesikhathi ephumile utshiye ebavalele kuphela. Waphuma umphrofethi wazongibuza ukuthi umkakhe engabe eyengaphi njengoba ngangikhona ngithengisa. Wangithola ngime loMandla owayedakwe kakhulu engazazi”.
“Ngisithi ngisazama ukumphendula, uMandla wahle wathi umfazi wakho ukomakhelwane bayazikholisela lejaha lakhe elitsha. Umphrofethi akazange akufake ekhanda okwakukhulunywa ngujaha lowo wahle wazitshela ukuthi udakiwe njalo kayazi into ayikhulumayo. Umphrofethi wasusa amehlo akhe kumfana lowo wawasa kimi emelele ukuthi ngimphendule. Ngagagasa kakhulu uMandla wahle wadonsa umphrofethi ngesandla esithi asambe ngiyekubonisa umkakho.”
“Bangena egedini UMandla waqala ukumemeza eqoqoda emnyango. Kwahlala isikhatshana u Lovemore wavula umnyango eme lomfazi kamphrofethi bonke bevule amehlo bethukile. Ngokubona lokhu umphrofethi wahle wadla amalahle waqala ukujika ingqindi engelandaba ukuthi ziwela kumfazi wakhe kumbe ku Lovemore. Kwakhala izimbiza lemiganu iwela phansi umphrofethi egijimisa u Lovemore bagcwala indlu yonke. Waphuma ecela ezinyaweni umakhelwane wagwenxwa zinsimbi zegedi ezaziphumele ngaphandle wayavuka ethulini laye umphrofethi wazithela phezulu kwakhe wamtshaya kakhulu. Obaba ababedlula babona okwakusenzakala bahle bazama ukumbambisana sebebona esebulala umuntu ngezandla”.
“Esabanjiwe umprofethi umakhelwane elimele enjalo wahle wasukuma wabaleka. Kwabuya ababtu abanengi bazozama ukubhula umsindo bazama ukukhulumisana kodwa umprofethi wayelokhu elolaka. Wangena endlini umprofethi umkakhe wesaba ukumlandela kodwa abantu babemtshela ukuthi ayendlini kuyekhulunywa. Walandela kaye umkakhe kodwa vele wayesehlisa izinyembezi esesaba kokuba endlini.”
“Abacina ukumbona u Lovemore bathi wasuka ngaleyo ntambama wabaleka lalamuhla akakaphenduki. Akula owabakwazi ukuthi umprofethi wamenzani umkakhe kodwa ekuseni bavuka bethutha njengoba babeloja.”
USinanzeni uphethe ngokuthi akwaziwa ukuthi bayangaphi Korea kwasekuvele sekulihlazo elalenzekile umprofethi wacabanga ukuthi asuke kuleyondawo. Abantu basalinde ukuthi uLovemore aphenduke bezombuza ngesenzo sakhe.
Online Reporter