admin
YiNtatheli kaMthunywa
IKhansili yedolobho lakoBulawayo, iBCC, ibika ukuba ayisoze ivule umkambo wodumo osenzikini yedolobho okuthengiswa khona umbhida, amatamatisi, amakhabitshi lokunye.
Indawo le ekuzitalada zika 5th Avenue, Robert Mugabe Way lo-Jason Moyo kubikwa izavalwa kokuphela kulandela ukuqhamuka kwegcikwane leCovid-19.
Kubikwa loba iCovid-19 ingaphela, kuzadonsa isikhathi imakethi le ivaliwe.
Umqondisi wezindlu lokuphawulwa kwenhlelo zikazulu kukhansili yakoBulawayo, uMnumzana Dictor Khumalo wazise ukuba ikhansili ithethe izinqumo zokuthi ivale imakethi enkulu, kuvulwe imkambo emncane emalokitshini duzane lalapho okuhlala khona abantu.
Kumalanga adluleyo, abantu bebegijimela ukugcwala enzikini yamabhizimusi edolobheni bethenga imbhida, okuyikho obesekubuyisela muva izinqumo zokwenqabela ukumemetheka kweCovid-19.
Kumbiko wekhansiki okhitshwe ngeviki edluleyo kubikwa ukuvalwa kwemakethi kuvele kuHulumende, ngemzamo yokuthi amadolobho wonke abumbe uhlelo oluzaphathisa ekuthini kungabi lemuli ezihlaselwa yindlala ngesikhathi igcikwane leCovid-19 lihlasela. Ikhansili yakoBulawayo ingeyinye esilungiselele ukuthi incedise kuloluhlelo okuthiwa yiResilient Food Supply Chain System.
UMnu Khumalo wazise ukuba bonke abathengisayo bazaphiwa indawo emkambo esemalokitshini abalisa iTshabalala Market, Emganwini Mpedzanhamo, Sekusile, Nkulumane Complex, New Magwegwe Terminus, Lobengula West Konron, Magwegwe North Terminus, Old Pumula Market, Luveve Terminus Site, Cowdray Park, Entumbane Complex, Entumbane Flea Market, Njube Market, Mabuthweni Market, Makokoba Market, Makokoba Efusini, Nkunzi Beer Garden laseBurombo Beer.
“Idoobho lakoBulawayo selibone kufanele ukuthi kube lendawo ezihlanzekileyo lapho okuthengiselwa khona ukudla. Indawo lezi zizakuba seduzane lalapho okuhlala khona abantu,” kutsho uKhumalo.
UMnu Khumalo uqhubeke wathi abathengi labathengisi kuzamele balandele imilayo yokuvikela ukumemetheka kwegcikwane leCovid-19.
“Abathengisi kumele bavule imkhandlo engaba yimitha eyodwa, kulandelwe iSocial Distancing. Kumele bageze izandla ngaso sonke isikhathi besebenzisa isepa kumbe lemithi yokubulala amagcikwane.”
Abathengisi bakhuthazwe ukuthi bengavumi abathengi bebambe ukudla loba yini ethengiswayo.
Online Reporter