adminCornelius Luphahla
KULESAKHAMUZI sesigabeni seDibudibu emngceleni weTsholotsho leLupane esifumbathise esinye imbuzi sivala ukuba singaze sadlulisela indaba le emthethwandaba.
Indaba le yenzakale ngeSonto kuyonale iviki lapho uMnumzana Gibson Mabhena anike khona uMnumzana Lucky Maphosa inkalakatha yempongo emvala ukuthi ayekwesula icala lingayi emthethwandaba njengoba wamephula ingalo ngomgigo bebanga imiqwente.
UMthunywa uxhumane loMnumzana Felix Ngwenya oyisakhamuzi sakule indawo waveza ukuthi uMnu Mabhena wephula uMnu Maphosa ngomgigo bebanga ukuthi wayetshontshe imiqwente.
“UMabhena samthola etshontsha imiqwente esivandeni sikaMaphosa kunyanga ephelileyo wasuka wabaleka sathi sesimlanda emzini wakhe wahle wadobha umgigo mina ngabaleka wasala etshaya uMaphosa waze wamephula ingalo.
“Ngemva kwalokho sahambisa uMaphosa esibhedlela sabuya njalo saya emapholiseni okwadala ukuthi amapholisa ambophe. Uthe ngemva kokukhululwa kwakhe selindele ukuyathonisiswa wasehambisa imbuzi yokuyaxolisa kuMaphosa laye wayemukela kuhle,” kulandisa uMnu Ngwenya.
UNkosazana Faith Ncube ongumkaMnu Maphosa ubikele intatheli ukuthi indaba le yenzakala kodwa siphelile ngoba sebexolisene loMabhena noma njalo imbuzi ayikhiphileyo ibingeyokunye.
“Ukuthi umkami loMabhena bake baxabana kuliqiniso sibili kodwa sesikhulumisene njengabomakhelwane sesula icala ukuthi lingasathoniswa emthethwandaba. Imbuzi le ekhitshwe nguMabhena kayisiyo yokuvalwa kodwa kukhona esakukhulumelanayo loMabhena noma nje usobhuku singazange samazisa,” kutsho uNkszn Ncube.
UMnu Mabhena ebuzwa ngale indaba uvumile ukuthi yenzakala wathi waphambanisa kakhulu kodwa sebakhulumelana lomakhelwane wakhe.
“Ngake ngaxabana lomakhelwane wami ngoba ngangimphambanisile esivandeni sakhe kodwa sesakhuluma ngaxolisa kwaphela ngakho ngiyamangala ukuthi oseyivusile indaba le wayibikela lamaphephandaba ngubani,” kutsho uMnu Mabhena.
Usobhuku wakule indawo uMnumzana Danisa Ncube uthe indaba le uyizwile kodwa kakwazi ukuthi bahlawulane njani ngoba abasamazisanga.
“Indaba yokuxabana kukaMabhena loMaphosa ngiyayazi sibili bangitshela kodwa okungimangalisayo yikuthi ngizwe sokuthiwa uMabhena uhlawule uMaphosa ngembuzi bengazange bangazisa,” kuphetha uMnu Ncube.
Online Reporter