adminJohas Moyo
ZISELE zididekile izakhamizi zakoSimana esigabeni seSilobela bucwadlana ledolobho leKwekwe ngemva kokuba enye indoda ikhithize intebe ephefumulayo okucatshangelwa ukuba ibungumuthi wenhlanhla nanko phela kubikwa ibheja amakhasi sikhathi sonke inqoba.
Kubikwa ukuthi intebe le, kaMnumzana Sipho Zibulawa ikhithike ngeviki ephelileyo phakathi komdlalo wamakhasi.
UMthunywa uzwe ukuthi intebe le ebisenqulwini kaZibulawa ibisaphonjwana lwembuzi njalo ibiphefumula.
Ekhuluma ngaloludaba uMnumzana Linos Mnguni oveze ukuthi yena wayekhona kusenzakala lesisiga uthe abantu basebefuna lokumudla uZibulawa ngesikhathi intebe le ikhithika.
“Lwangitshaya lwangeqa uvalo kukhithika okuluphondo kwembuzi okuncane okudikizayo njengenkanda yomntwana.
Umnikazi laye wethuka wathi lothu wabesekudobhile wakuthi tshwathi esikhwameni.
“Kulapho-ke abantu abaxokozela khona sebefuna ukumtshaya ngoba sebebona ukuthi ngumuthi wakhe lo omenza ahlale enqoba emakhasini kukanti abanye bahle babaleka sebesesaba,” kutsho uMnu Mnguni.
UMthunywa uxhumane loMnumzana Vikani Dube oyisakhamuzi sakuleyondawo yena oveze ukuthi lokhe ethithibele ngakubona emakhasini.
“Ngilokhe ngingelankani ngengakubonayo mhlalokho. Kambe abantu bangahamba bebophele izinto ezinzima kangaka emizimbeni yabo ngokufuna imali nje kuphela.
“Into eyangimangalisayo yikuthi sathi simbuza ukuthi ngumuthi wani owesabisa kangaka waveza ukuthi ngumelusi wakhe, amtshiyelwa nguyise.
“Isimanga esaba laso kodwa yikuthi intebe le yayidikiza njengenkanda yomntwana njalo yayingakhangeleki isesabeka,” kutsho uMnu Dube.
Imizamo yokuzwisisa ngendaba yentebe le kuMnu Zibulawa yehlule ngoba umakhalekhukhwini wakhe ubengadojwa kwaze kwafika isikhathi sokudindwa kwephephandaba.
Online Reporter