Vusumuzi Dube
Ethel Ncube
IZAKHAMIZI zelokitshini le-Amaveni, eKwekwe zilokhu zitshwaqe umzimba kulandela ukufa komfundi obekuFomu 3 esikolo se-Amaveni High School okubikwa unathe itshefu esola ukukhuzwa ngabazali.
Umfundi lo, uNothando Moyo obeleminyaka engu-16 kubikwa ufe ngeSonto.
Kumibiko esabalala kunkundla zokuxhumana, kubikwa ukuthi umfundi lo ufe ngemva kokunatha itshefu esola ukukhuzwa ngabazali bakhe ngokuphuza ukufika ngakibo ngoMgqibelo nanko wayengaphiwanga imvumo yokuya edilini.
Loba abazali bakhe bazama ukumqondisa baze bacela lomfundisi ukuba ameluleke yena kazange akuthathe kuhle nanko wathi efika ngekhaya wanatha itshefu.
UMqondisi wezokukhulumisana kugatsha lwezemfundo uMnumzana Taungana Ndoro uthe njengogatsha lwezeMfundo yaphansi laphezulu, balokudana ngokufa komfundi, uNothando Moyo, obekuFomu 3 esikolo se-Amaveni High School.
“Ngimele uMphathintambo wezemfundo kanye lemuli yezemfundo, sethula amazwi enduduzo kumuli yakoMoyo, ababalisi kunye lezakhamizi zeKwekwe ngalesisikhathi sokulahlekelwa. Ukufelwa ngumntwana yisikhathi esibuhlungu kumzali njalo akulamzali okumele alahlekelwe ngumntwana. Silokudana ngokulahleka komuntu omutsha. Siyazwisisa ukuthi abazali bakaNothando bebefuna ukumqondisa ngothando, njalo siyazi baphakathi kobuhlungu njengoba bebhekane lalesi isikhathi esinzima. Siyabancoma njalo ngokudinga usekelo lukamfundisi kundodakazi yabo, okutshengisa ukuthi bebezama ukumqondisa ngeqiniso.
“Lesi sehlakalo sisikhumbuza ngobunzima abantwana abakulesi sigaba sokukhula abavame ukubhekana laso. Ngalesisikhathi abatsha bayadideka ngemizwa, bangazi indlela eyiyo. Njengogatsha lwezemfundo siyazi ukuba ezemfundo kumele zihambisane lokusekelwa kwempilakahle yengqondo kanye lokusizakala ngemva kwezinhlupho.
“Ngenxa yalesi isehlakalo, sifisa ukuthi siqinisekise uzulu ngamasu esilawo njalo esiwathuthukisayo, ukuze sivikele izenzo ezibuhlungu ezinjengalezi njalo sisekele abafundi bethu,” kutsho uMnu Ndoro.
Online Reporter