KULOMFUNDI weMidlands State University odutshulwe wafa ngowayengumkakhe, ongumqondisi wenkampani yabonogada koBulawayo, ngemva kokungazwanani phakathi kwabo eGweru.
Umfundi lo, oleminyaka engu-25 yokuzalwa udutshulwe esiphaqeni ilanga selisiya ngomtsha wendoda ngoLwesine endlini lapho abehlala khona ku Number 1082, eSenga KMP, ngumetheswacala, okulokhu kuthungathwa umkhondo wakhe.
Kubikwa umetheswacala ubuye wethusela abanye abafundi wabavalela lesidumbu endlini leyo andubana adliwe ngumswenya ngemota yohlobo lweToyota Wish inombolo zayo ezingakaziwa.
Intatheli ibuza isikhulumi samapholisa eNkabazwe, uInspector Emmanuel Mahoko ngesehlakalo lesi uthe intatheli ikhulumisane lesikhulumi samapholisa elizweni uCommissioner Paul Nyathi.
Amapholisa aqinisekisa ngesehlakalo esenzakale eKMP, ezindlini zeSenga mhlaka 9 Mfumfu ngehola lesihlanu ilanga selisiya ngomtshawendoda. Ongasekho emhlabeni, ubengumfundi weMSU, udutshulwe wafa ngokucatshangelwa ukuthi wayengumkakhe. Ukuze uthole umbiko ogcweleyo thinta uCommissioner Paul Nyathi,” kutsho uInsp Mahoko.
“Kusitatimende samapholisa, umetheswacala uvakatshele umfundi lapho ahlala khona ngehola lika-3 ngaphambi kokuba baxabane ngemva kwamahola amabili lengxenye.
“Umetheswacala ucine edubula umfundi esiphaqeni esebenzisa i-pistol engaziwayo ukuthi yiwuphi umhlobo,” kuveza umbiko lo.
Kusitatimende kubikwe njalo ukuthi abanye abafundi beMSU abahlala kuleyondlu baphume emakamelweni abo besizwa ukudubuka kombhobho, kodwa umetheswacala wabatshela ukuthi uzabadubula labo.
“Ubathathele omakhalekhukhwini babo, wabajikijela esambuzi andubana abakhiyele endlini lapho okwakulesidumbu khona,” kuchaza umbiko.
Umetheswacala ubaleke ngemota, watshiya abafundi bekhiyelwe endlini.
Amapholisa abikelwe ngesehlakalo lesi, babuya bazochwayisisa ngaso.
Isidumbu sitholakale sikhangele phezulu siphakathi kwechibi legazi. Umfundi lo, ubegqoke impahla zokulala njalo abacuphi bananzelele ukuthi bekulenxeba lombhobho esiphaqeni.
Kutholakale i-6.25mm cartridge phansi, lomakhalekhukhwini wohlobo lwe-Itel mobile phone le Samsung Galaxy A05 kuleyondlu.
Ukuchwayisisa okwenziweyo kuveze ukuthi umetheswacala unguMqondisi wenye inkampani yabonogada yakoBulawayo.
Amapholisa adinga umetheswacala njalo bafuna lombhobho awusebenzisayo.
Icala leli liphathwa njengelokubulala ngaphansi kukaSigaba 47 weCriminal Law (Codification and Reform) Act [Chapter 9:23].
Amapholisa lokhe esadinga umetheswacala.
